ޚަބަރު
ސެއިންޓް ލޫސިއާގެ މިނިވަން ދުވަހުގެ މުނާސަބަތުގައި ރައީސުލްޖުމްހޫރިއްޔާ ތަޙުނިޔާ ފޮނުއްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ފޮޓޯ: ރައީސް އޮފީސް

ފަރުދުން
22 ފެބްރުއަރީ 2025، 11:00
22 ފެބްރުއަރީ 2025، 11:00
ސެއިންޓް ލޫސިއާގެ މިނިވަން ދުވަހުގެ މުނާސަބަތުގައި، އެ ޤައުމުގެ ގަވަރނަރ ޖެނެރަލް، ހިޒް އެކްސެލެންސީ ސައިރިލް އީ.އެމް. ޗާލްސް އާއި ބޮޑުވަޒީރު، ހިޒް އެކްސެލެންސީ އޮނަރަބަލް ފިލިޕް ޖޯސެފް ޕިއޭރ، އަދި އެޤައުމުގެ ސަރުކާރަށާއި ރައްޔިތުންނަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތަޙުނިޔާ އާއި ހެޔޮއެދުންތައް ފޮނުއްވައިފިއެވެ.
މި މެސެޖުގައި ރައީސުލްޖުމްހޫރިއްޔާ ވަނީ އެ މަނިކުފާނުގެ އަމިއްލަ ނަންފުޅުގެ އިތުރުން، ދިވެހި ސަރުކާރާއި ރައްޔިތުންގެ ފަރާތުން ވެސް ހެޔޮއެދުންތައް އަރިސްކުރައްވާފައެވެ.
ރައީސުލްޖުމްހޫރިއްޔާ މި ދެ ބޭފުޅުންނަށް ވެސް މެސެޖުތައް ފޮނުއްވެވީ ވަކިވަކިންނެވެ. އަދި ދެ މެސުޖުގައި ވެސް އެ ބޭފުޅުންނަށް ދުޅަހެޔޮ ޞިއްޙަތަކާއި، އުފާފާގަތިކަމާއި، އަދި ސެއިންޓް ލޫސިއާގެ ރައްޔިތުންނަށް ކުރިއެރުމާއި ފާގަތިކަމަށް އެދިވަޑައިގެންފައިވެއެވެ.
ސެއިންޓް ލޫސިއާ މިނިވަންވެފައިވަނީ 1979 ވަނަ އަހަރުގެ ފެބްރުއަރީ މަހުގެ 22 ވަނަ ދުވަހެވެ. އަދި ކެރީބިއަންގައި އޮންނަ މި ޤައުމުގެ އާބާދީއަކީ ގާތަގަނޑަކަށް 180،000 މީހުންނެވެ.