Ads by Exprox

ޚަބަރު

ދ. އަތޮޅު ހޮސްޕިޓަލުގެ އައު އިމާރާތުގެ ބިންގާ އަޅުއްވާދެއްވައިފި

ދ. އަތޮޅު ހޮސްޕިޓަލުގެ އައު އިމާރާތުގެ ބިންގާ އަޅުއްވާދެއްވައިފި

ދ. އަތޮޅު ހޮސްޕިޓަލުގެ އައު އިމާރާތުގެ ބިންގާ އެޅުއްވުން

ޙައްވާ ޒައިބާ މުޙައްމަދު

ޙައްވާ ޒައިބާ މުޙައްމަދު

23 ފެބްރުއަރީ 2025، 07:20

23 ފެބްރުއަރީ 2025، 07:20

ދ. އަތޮޅު ހޮސްޕިޓަލްގެ އައު އިމާރަތުގެ ބިންގާ އަޅައިފިއެވެ. ހޮސްޕިޓަލްގެ އައު އިމާރާތުގެ ބިންގާ އަޅުއްވައިދެއްވީ ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރެވެ.

ދ. އަތޮޅު ހޮސްޕިޓަލުގެ އައު އިމާރާތުގެ ބިންގާ އަޅުއްވާފައި ވަނީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ދ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު އެ އަތޮޅު ކުޑަހުވަދޫއަށް ވަޑައިގެންނެވެ. ދ. އަތޮޅު ހޮސްޕިޓަލުގެ އައު އިމާރާތުގެ މަސައްކަތް ހަވާލުކޮށްފައިވަނީ ރޯޑް ޑިވެލޮޕްމަންޓް ކޯޕަރޭޝަން، އާރްޑީސީ އާއެވެ. 181 މިލިއަން ރުފިޔާ ޚަރަދުކޮށްގެން އިމާރާތްކުރާ މި ހޮސްޕިޓަލުގެ މަސައްކަތް 18 މަސްދުވަހުގެ ތެރޭގައި ނިންމުމަށް ވަނީ ހަމަޖެހިފައެވެ.

ދ. އަތޮޅު ހޮސްޕިޓަލުގެ އައު އިމާރާތް ޤާއިމްކުރާނީ، 50 އެނދާއި، މެމޮގްރަފީ ޚިދުމަތް، ޑެންޓަލް އޯޕީޖީ، ކަށީގެ ފަރުވާއަށް ޚާއްސަ އޯތޯ-ތިއޭޓަރު އަދި ޕްރައިވެޓް ރޫމް ފެސިލިޓީތައް ހިމެނޭހެން ޒަމާނީ ފެނަވަރުގައެވެ. މީގެ އިތުރުން، ސްޓާފުންނާއި އަތޮޅުތެރޭގެ މުވައްޒަފުންނަށް ތަމްރީން ދިނުމަށް ބޭނުންވާ ފެސިލިޓީތައްވެސް މި ހޮސްޕިޓަލުގައި ޤާއިމްކުރެވޭނެއެވެ. ހަމަ އެހެންމެ، ހޮސްޕިޓަލުގެ ހުރިހާ އެނދަކަށް ޕައިޕްޑް އޮކްސިޖަން، މެޑިކަލް އެއަރ އަދި ސަކްޝަން އަޅާފައި ހުންނާނެ ކަމަށާއި، ހަކަތައިގެ ޚަރަދު ކުޑަކުރުމަށް ސޯލަރ ޕީވީ ސިސްޓަމެއް ހަރުކުރެވޭނެކަމަށް ވެސް ސިއްޙަތާ ބެހޭ ވުޒާރާއިން ވިދާޅުވިއެވެ. 

މީގެ އިތުރުން، ޕަވަރ ބެކަޕް ސިސްޓަމް، ވޭސްޓް މެނޭޖްމަންޓް ސިސްޓަމް، އަދި ހޮސްޕިޓަލް ގްރޭޑް އިންޑަސްޓްރިއަލް ލޯންޑްރީ ސެޓަޕެއްވެސް މި ހޮސްޕިޓަލުގައި ޤާއިމްކުރެވޭނެއެވެ. އަދި މި ހޮސްޕިޓަލް ޤާއިމްކުރާ ކުޑަހުވަދޫއަކީ އެއަރޕޯޓެއް އޮންނަ ރަށެއް ކަމުން، އިމަރޖެންސީ ހާލަތްތަކުގައި ބޭނުންކުރެވޭނެ އިމަރޖެންސީ އީއާރެއްވެސް ޤާއިމްކުރެވޭނެ ކަމަށް ސިއްޙަތާ ބެހޭ ވުޒާރާއިން މަޢުލޫމާތު ދެއްވިއެވެ. ހަމަ މިއާއެކު، ކޯވިޑް ފަދަ ބަލިތައް ފެތުރޭ ހާލަތްތަކުގައި ހޮސްޕިޓަލުގެ ޚިދުމަތް މެދުނުކެނޑި ދެވޭނެ ގޮތަށް ފްލޫ ކްލިނިކާއި އައިސޮލޭޝަން ފެސިލިޓީވެސް ހިމެނޭނެއެވެ.

މި އައު ހޮސްޕިޓަލް ޤާއިމްކުރުން ޖާގައިގެ ދަތިކަން ޙައްލުވެ، ރަށުގެ ރައްޔިތުންނާއި އަތޮޅުތެރޭގެ އެހެން ރަށްތަކުގެ ރައްޔިތުންނަށް ވެސް ލުއިފަސޭހަތަކެއް ވެގެން ދާނެއެވެ. 

މި ލިޔުން ކިޔާލުމުން

Ads by MSS