Ads by Exprox

ޚަބަރު

ގޯތީގައި ގެއެއް އެޅުމަށް ޝައުގުވެރިވާނަމަ ހައުސިން މަޝްރޫޢުގެ ތެރެއިން އެކަން ކޮށްދެނީ

ގޯތީގައި ގެއެއް އެޅުމަށް ޝައުގުވެރިވާނަމަ ހައުސިން މަޝްރޫޢުގެ ތެރެއިން އެކަން ކޮށްދެނީ

ރައީސުލްޖުމްހޫރިއްޔާ ކުޑަހުވަދޫގެ ރައްޔިތުންނާ ބައްދަލުކުރެއްވުން---

މިފްތާޙް މުޙައްމަދު

މިފްތާޙް މުޙައްމަދު

23 ފެބްރުއަރީ 2025، 10:50

23 ފެބްރުއަރީ 2025، 10:50

ރަށުގެ ހިއްކި ބިމުން ނުވަތަ ރަށު ތެރެއިން ވިޔަސް އަމިއްލަ ގޯއްޗެއް ލިބި، އެ ގޯތީ ހެދުމުގެ މާލީ ތަނަވަސްކަން ނެތް ފަރާތްތަކުން، އެ ފަރާތްތަކުގެ ގޯތީގައި ގެއެއް އެޅުމަށް ޝައުގުވެރިވާނަމަ، ދ. ކުޑަހުވަދޫގައި ހިންގާ ހައުސިން މަޝްރޫޢުގެ ތެރެއިން އެކަން ކޮށްދެއްވާނެކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

އެ މަނިކުފާނު މިހެން ވިދާޅުވީ، މިއަދު ދ އަތޮޅުގެ ބައެއް ރަށްރަށަށް ފެއްޓެވި ދަތުރުފުޅުގެ ތެރެއިން އެ އަތޮޅު ކުޑަހުވަދޫގެ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައެވެ.

ރައީސުލްޖުމްހޫރިއްޔާ ވިދާޅުވީ، މިއީ ރައްޔިތުންނާއި ކައުންސިލުން އެއްބަސްވާކަމެއްނަމަ، އެކަން އެ ގޮތަށް ކުރިޔަށް ގެންދިއުމަށް އެ މަނިކުފާނު ވިސްނަވާކަމުގައެވެ. 

އެގޮތުން، މިކަން ކުރިޔަށްގެންދާނީ ކުޑަހުވަދޫގައި އެޅުމަށް ނިންމާފައިވާ 500 ހައުސިން ޔުނިޓުގެ ތެރެއިންކަމަށާއި، ހައުސިން ޔުނިޓު އަޅާނެ ވަކިއަދަދެއް ނިންމާނީ، ގޯތީގައި ގެ އެޅުމަށް ޝައުގުވެރިވާ ފަރާތްތައް ބެލުމަށްފަހުކަމުގައި ވެސް އެ މަނިކުފާނު ވިދާޅުވިއެވެ.

މިހާރު އަޅުގަނޑުމެން އިޢުލާންކޮށްފައި މިއޮތް 500 ހައުސިން ޔުނިޓު އެޅުމުގެ މަޝްރޫޢު، އެ މަޝްރޫޢު ކުރިޔަށް ގެންދިއުމުގައި އަޅުގަނޑުގެ ވިސްނުމަކީ، ކައުންސިލާއި ރައްޔިތުން ބޭނުންވެލައްވާނަމަ، ތިބޭފުޅުންނަށް ލިބިފައިވާ ވަރަށް ގިނަ ގޯތި ރަށުގައި މިހިރީ، ހިއްކި ބިމުގައާއި ރަށުގެ އެކިތަންތާ، އެ ގޯތިތަކުގައި ގެދޮރުއެޅުމުގައި މާލީ ދަތިތައް ހުރުމާ އެކީގައި، މި 500 ހައުސިން ޔުނިޓުގެ މަޝްރޫޢުގެ ތެރެއިން، ތިބޭފުޅުންގެ އަމިއްލަ ގޯތީގައި 3 ކޮޓަރީގެ ގެއެއް އަޅަން ބޭނުންވާ ފަރާތްތަކުން އެކަން ފާހަގަކުރުމުން، އަޅުގަނޑުމެން މި 500 ހައުސިން ޔުނިޓުގެ ތެރެއިން ވަކިއަދަދެއް ކަނޑައަޅާނީ، ތިބޭފުޅުންގެ އަމިއްލަ ގޯތީގައި ގެއެއް އަޅައިދޭން.

ރައީސުލްޖުމްހޫރިއްޔާގެ ވިސްނުންފުޅު ކިޔައިދެއްވަމުން ވިދާޅުވިއެވެ.

ކުޑަހުވަދޫގެ ހައުސިން މަޝްރޫޢަކީ ތިން ކޮޓަރީގެ އެޕާޓްމެންޓުތަކެއް އެޅުމަށް ހިންގަން ނިންމާފައިވާ މަޝްރޫޢެއްކަމުން، މިގޮތަށް ގޯތީގައި ގެއެއް އެޅެމަށް ޝައުގުވެރިވާ ފަރާތަކަށް ބިނާކޮށްދެވޭނީ ތިން ކޮޓަރީގެ ގެއެއްކަމަށް ވެސް ރައީސުލްޖުމްހޫރިއްޔާ ވިދާޅުވިއެވެ.

އަދި ކުޑަހުވަދޫއަކީ ކުރިޔަށް އޮތްތާންގައި މީހުން ހިޖުރަކުރާނެ ރަށެއްކަމުން، އެ ރަށުގައި ބޯހިޔާވަހިކަމުގެ އިތުރު މަޝްރޫޢުތައް ހިންގަވާނެކަމަށް ރައީސުލްޖުމްހޫރިއްޔާ ވިދާޅުވިއެވެ. މީގެ އިތުރުން މިހާރު ހުރި ގޯތިތައް އިމާރާތް ކުރުމަށް، މުޅި ރާއްޖެއަށް ހުޅުވާލާފައިވާ ލޯން ސްކީމަކީ ވެސް ރައްޔިތުންނަށް އޮތް ލުއިގޮތެއްކަމަށް އެ މަނިކުފާނު ވިދާޅުވިއެވެ.

ކުޑަހުވަދޫގެ ބޯހިޔާވަހިކަމުގެ މައްސަލަ ކުޑަކުރުމަށް، އެ ރަށުގައި ބިން ހިއްކާފައި އޮންނަތާ މިހާރު 11 ވަރަކަށް އަހަރުވެއްޖެއެވެ. އަދި ހިއްކި ބިމުން މިހާރު ގޯތި ދޫކޮށްފައިވީނަމަވެސް، އެތާންގައި ފެނާއި ނަރުދަމާގެ ޚިދުމަތް ނެތުމުން، މި ގޯތިތަކުގައި އިމާރާތް ބިނާކޮށް އެތަނަށް ހިޖުރަ ކުރެވޭނެ ގޮތެއް އަދި ނެތެވެ. 

ނަމަވެސް މި މައްސަލަ ޙައްލުކޮށްދެއްވުމަށް، މިރޭ ވަނީ ކުޑަހުވަދޫގެ ހިއްކި ބިމުގައި ފެނާއި ނަރުދަމާގެ ޚިދުމަތް ޤާއިމްކުރުމާއި އަދި ކުޑަހުވަދޫގައި މިހާރު ޤާއިމްކޮށްފައިވާ ފެނުގެ ނިޒާމުގެ ކެޕޭސިޓީ އިތުރުކުރުމުގެ މަސައްކަތުގެ އެއްބަސްވުމުގައި ސޮއިކޮށްފައެވެ. 

މި ލިޔުން ކިޔާލުމުން

Ads by MSS