ވިޔަފާރި / ޚަބަރު
މި އަހަރު ނިމުމުގެ ކުރިން ކުޑަހުވަދޫގައި ޑޮލަރު އޭޓީއެމްއެއް ޤާއިމުކުރާނެކަމަށް ރައީސުލްޖުމްހޫރިއްޔާ ވިދާޅުވެއްޖެ
ބޭންކް އޮފް މޯލްޑިވްސްގެ ޑޮލަރ އޭޓީއެމް---
މި އަހަރު ނިމުމުގެ ކުރިން ކުޑަހުވަދޫގައި ޑޮލަރު އޭޓީއެމްއެއް ޤާއިމުކުރާނެކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ދ އަތޮޅަށް ކުރައްވަމުން ދެންދަވާ ދަތުރުފުޅުގައި ކުޑަހުވަދޫގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސުލްޖުމްހޫރިއްޔާ ވިދާޅުވީ، މި އޭޓީއެމްގެ ފައިދާ އެ ރަށަށާއި އެ ސަރަޙައްދަށް ކުރާނެކަމަށެވެ.
މިކަން ރައީސުލްޖުމްހޫރިއްޔާ އިޢުލާންކުރެއްވިއިރު، އެ ރަށުގައި ބޭންކް އޮފް މޯލްޑިވްސްގެ ބްރާންޗެއް އެޅުމުގެ ބިންގާ ވަނީ މިއަދު އަޅާފައެވެ. މީގެ އިތުރުން، ސެލްފް ސާރވިސް ބޭންކިންގެ އިތުރު އޭޓީއެމްއެއްގެ ޚިދުމަތް ވެސް މިއަދު އެ ރަށުގައި ވަނީ ދޭން ފަށާފައެވެ.
ކުޑަހުވަދޫގައި މިއަހަރު ޑޮލަރު އޭޓީއެމްއެއް ޤާއިމްކުރައްވާނެކަމުގެ ޔަޤީންކަން ދެއްވިއިރު، މި މަހު އައްޑޫގައި ވެސް ޑޮލަރު އޭޓީއެމްއެއް ވަނީ ބަހައްޓާފައެވެ.
މުޅި ރާއްޖެއަށް ބޭންކް އޮފް މޯލްޑިވްސްގެ އޭޓީއެމް ޚިދުމަތް ފޯރުކޮށްދިނުމުގެ މަސައްކަތް ސަރުކާރުން ފަށާފައިވަނީ މިދިޔަ އަހަރުގެ ނޮވެމްބަރު މަހުގެ ތެރޭގައެވެ. މި މަޝްރޫޢުގެ ދަށުން ރައްޔިތުންގެ މާލީ ބައިވެރިވުން އިތުރުކުރުމަށް ގިނަ މަސައްކަތްތަކެއް ކުރުމަށް ސަރުކާރުން ވަނީ ރާވާފައެވެ.
