މި ސަރުކާރުން ވެރިކަމާއި ހަވާލުވެވަޑައިގެންނެވިއިރު ޤައުމުގެ ޙާލަތު އޮތް ގޮތް މިއަދާއި ވަރަށް ތަފާތު: ރައީސް

މި ސަރުކާރުން ވެރިކަމާއި ހަވާލުވެވަޑައިގެންނެވިއިރު ޤައުމުގެ ޙާލަތު އޮތް ގޮތް މިއަދުގެ ޙާލަތާއި ވަރަށް ތަފާތުކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. 

ރައީސުލްޖުމްހޫރިއްޔާ މިފަދައިން ވިދާޅުވީ، ދ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އެ އަތޮޅު ކުޑަހުވަދޫއަށް ވަޑައިގެން އެ ރަށުގެ ރައްޔިތުންނާއި ބައްދަލުކުރެއްވުމަށް ބޭއްވެވި ޖަލްސާގައި ވާހަކަފުޅުދައްކަވަމުންނެވެ.

ރައީސުލްޖުމްހޫރިއްޔާ ވިދާޅުވީ، އެމަނިކުފާނު ވެރިކަމާއި ހަވާލުވެވަޑައިގެންނެވިއިރު ފުރަތަމަ ޢަމަލުކުރައްވަން ޖެހިވަޑައިގަތީ އޭގެ ކުރިން އޮތް އެމްޑީޕީ ސަރުކާރުން އެކުލަވާލާފައިވާ ބަޖެޓުގެ މައްޗަށް ކަމަށެވެ. ނަމަވެސް، އެ ބަޖެޓު އެކުލަވާލައްވާފައިވަނީ އެމަނިކުފާނު ރައްޔިތުންނަށް ވެވަޑައިގެންނެވި ވަޢުދުތައް ފުއްދޭނެފަދަ ގޮތަކަށް ނޫން ކަމަށް ރައީސް ވިދާޅުވިއެވެ. އެހެންކަމުން، އެމަނިކުފާނު ވެރިކަމާ ހަވާލުވެވަޑައިގަތުމަށްފަހު ފުރަތަމަ އަހަރުތެރޭގައި ކުރެއްވެވި މަސައްކަތުން ރައްޔިތުންނަށް ވެފައިވާ ވަޢުދުތައް ފުއްދުމަށް މިއަދު މަގުފަހިވެފައިވާކަމަށް ރައީސް ވިދާޅުވިއެވެ.

މީގެ އިތުރުން އެމަނިކުފާނު ވިދާޅުވީ، ރާއްޖޭގެ އިޤްތިޞާދު ކޮޅަށް ޖެހުމަށް ބޭރާއި އެތެރޭގެ ދަރަނިތައް ޚަލާސްކޮށް އިޤްތިޞާދު އިތުރަށް ހަރުދަނާކުރެއްވުމަށް ގިނަ މަސައްކަތްތަކެއް ކުރެއްވުނު ކަމަށެވެ. އެހެންކަމުން، އޭރު ޤައުމުގެ ޙާލަތު އޮތް ގޮތާއި މިއަދު ޤައުމުގެ ޙާލަތު އޮތް ގޮތް ތަފާތުކަން އެމަނިކުފާނު ވަނީ ފާހަގަކުރައްވާފަ އެވެ. އަދި މިއަދު މި ފެންނަ ނަތީޖާއަކީ އެ މަނިކުފާނު އެޅުއްވެވި ހަރުދަނާ ފިޔަވަޅުތަކެއްގެ ސަބަބުން ނެރުއްވުނު ނަތީޖާއެއްކަމަށް އެމަނިކުފާނު ވަނީ ވިދާޅުވެފައެވެ. ރައީސް ވަނީ މި ނަތީޖާ ނެރެދެއްވުމުގައި ރައްޔިތުން ދެއްވެވި އެއްބާރުލުމަށް ޝުކުރު ދަންނަވާފައެވެ. 

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، އެމަނިކުފާނު ރައްޔިތުންނަށް ވެވަޑައިގެންފައިވާ ވަޢުދުތައް ފުއްދެވުމަށްޓަކައި ޢަމަލީގޮތުން މި އަހަރު ގިނަ މަސައްކަތްތަކެއް ކުރައްވަމުން ގެންދަވާނެ ކަމަށެވެ.