ޚަބަރު
މާއެނބޫދޫ ސިއްޙީ މަރުކަޒުގެ އެކްސްޓެންޝަން އިމާރާތް ހުޅުވައިދެއްވައިފި

މާއެނބޫދޫ ސިއްޙީ މަރުކަޒުގެ އައު އިމާރާތް ހުޅުވުމުގެ ރަސްމިއްޔާތު
ދ އަތޮޅު މާއެނބޫދޫ ސިއްޙީ މަރުކަޒުގެ އެކްސްޓެންޝަން އިމާރާތް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ހުޅުވައިދެއްވައިފިއެވެ.
މި އިމާރާތް ހުޅުވައިދެއްވީ، ދ އަތޮޅުގެ މީހުން ދިރިއުޅޭ ހުރިހާ ރަށަކަށް ވަޑައިގެންނެވުމަށް ރައީސުލްޖުމްހޫރިއްޔާ ފައްޓަވާފައިވާ ދަތުރުފުޅުގެ ތެރެއިން، މާއެނބޫދޫއަށް ވަޑައިގެން ހޮސްޕިޓަލްގެ އައު އިމާރާތް ހުޅުވުމަށް މިއަދު ބޭއްވި ޙާއްސަ ރަސްމިއްޔާތެއްގައެވެ.
މި ރަސްމިއްޔާތުގައި ދައުލަތުގެ ވަޒީރުންނާއި، ކުޑަހުވަދޫ ދާއިރާގެ މަޖިލިސް މެންބަރާއި، ދ އަތޮޅު ހޮސްޕިޓަލުގެ މުވައްޒަފުންނާއި، ދ އަތޮޅު ކައުންސިލްގެ ރައީސްގެ އިތުރުން އެ ރަށުގެ ރައްޔިތުން ބައިވެރިވެވަޑައިގެންނެވިއެވެ.
މި ރަސްމިއްޔާތުގައި ސިއްޙީ މަރުކަޒުގެ އައު އިމާރާތް ހުޅުވާދެއްވުމަށްފަހު ރައީސުލްޖުމްހޫރިއްޔަ ވަނީ އެ ތަން ބައްލަވާލައްވާފައެވެ.
މިއީ މާއެނބޫދޫގެ ސިއްޙީ މަރުކަޒުން ޚިދުމަތް ދިނުމަށް ދިމާވެފައިވާ ޖާގައިގެ ދަތިކަން ޙައްލު ކުރެއްވުމަށް ކުރިޔަށް ގެންދިޔަ މަޝްރޫއެކެވެ.
އައު އިމާރާތާއެކު، އެ ސިއްޙީ މަރުކަޒުން އަލަށް ވަނީ ބައެއް ޚިދުމަތްތައް ވެސް ފަށާފައެވެ. އެގޮތުން އާންމު ސިއްޙަތުގެ ޚިދުމަތްތަކާއި، ދުންފަތުގެ އިސްތިޢުމާލު ކުރާ ފަރާތްތަކަށް ބޭނުންވާ ފަރުވާތައް ހިމެނެއެވެ. މީގެ އިތުރުން ގައިންގައިން ނާރާ ބަލިތަކަށް ފަރުވާ ދިނުމަށް ހާއްސަ ކްލިނިކަކާއި، މާބަނޑު މީހުންނަށް ދޭ ފަރުވާތައް ދިނުމަށް ހާއްސަ ކްލިނިކެއްގެ އިތުރުން ކުޑަކުދިންގެ ބަލިތަކަށް ފަރުވާދިނުމަށް ހާއްސަ ކްލިނިކެއް އައު އިމާރާތުގައި ވަނީ ޤައިމް ކުރެވިފައެވެ.
މި މަސައްކަތް ކޮންޓްރެކްޓަރުންނާ ހަވާލުކޮށްފައިވަނީ 2023 ގައެވެ. އަދި މަޢުލޫމާތު ލިބިފައިވާ ގޮތުގައި މި މަޝްރޫޢުގެ އަގަކީ 4.7 މިލިއަން ރުފިޔާއެވެ.