މާއެނބޫދޫގެ ބިން ހިއްކަވައިދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ދެއްވައިފި

މާއެނބޫދޫގެ ބިން ހިއްކަވައިދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދެއްވައިފިއެވެ.

އެ މަނިކުފާނު މިހެން ވިދާޅުވީ، ދ އަތޮޅަށް އިއްޔެ ފެއްޓެވި ދަތުރުފުޅުގައި މިއަދު ހެނދުނު އެ އަތޮޅުގެ މާއެނބޫދޫއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާ ވިދާޅުވީ، އެ މަނިކުފާނު މާއެނބޫދޫއަށް ވަޑައިގެންނެވި އެންމެ މުހިންމު އެއް ސަބަބަކީ ވެސް، މިކަމަށް ނުހަނު ބޭނުންޖެހިފައި ތިބި އެ ރަށުގެ ރައްޔިތުންނަށް މި އުފާވެރި ޚަބަރު ދެއްވުން ކަމުގައެވެ.

މި ކަމަކީ ރިޔާސީ އިންތިހާބުގެ ކެމްޕެއިންގައި ރައީސުލްޖުމްހޫރިއްޔާ ވެވަޑައިގެންފައިވާ ވަޢުދެއް ވެސް މެއެވެ.

މި މަޝްރޫޢު ފެއްޓެވުމުގެ ކުރިން މިހާރު ކުރިޔަށްދަނީ އޭއައިއޭގެ މަަސައްކަތް ކަމަށާއި، މި މަސައްކަތް ކޮންސްޓްރަކްޝަން މިނިސްޓްރީ އާއި އެންވަޔަރޮމެންޓް ޕްރޮޓެކްޝަން އެޖެންސީ (އީޕީއޭ) އާ ގުޅިގެން ކުރިޔަށްގެންދަވާކަމަށް ވެސް ރައީސުލްޖުމްހޫރިއްޔާ ވިދާޅުވިއެވެ.

މި ރަށުގަ މިހާރު އެމްޓީސީސީ އެ މަސައްކަތަށް ތައްޔާރުކޮށްފަ އޮންނާނީ. އީއައިއޭ ފާސްވުމާއެކީގަ، ބިން ހިއްކުމުގެ މަސައްކަތް އިރާދަކުރެއްވިއްޔާ ޢަމަލީ ގޮތުން ފެށޭނެ. ފެށި ބާރު ސްޕީޑުގައި ކުރިޔަށް ގެންގޮށްދޭނަން. އަދި އިރާދަކުރެއްވިއްޔާ އަޅުގަނޑު ރިޔާސީ އިންތިހާބުގައި ތިބޭފުޅުންނަށް ވަޢުދުވީ ގޮތަށް 30 ހެކްޓަރު ނިންމާލާނެކަމުގެ ޔަޤީންކަން ދެން.

ރައީސުލްޖުމްހޫރިއްޔާ ވިދާޅުވިއެވެ.

އަދި މި މަޝްރޫޢު ކުރިޔަށް ގެންދާނީ މާއެނބޫދޫގެ ރައްޔިތުން ބޭނުންފުޅުވާ ގޮތަށް ކަމަށާއި، އެގޮތުން 30 ހެކްޓަރުގެ ތެރެއިން 2 ހެކްޓަރު ހިއްކާނީ ވަކި ރަށެއްގެ ގޮތުގައިކަމަށް އެ މަނިކުފާނު ވިދާޅުވިއެވެ. 

އަދި މާއެނބޫދޫގައި ހިންގުމަށް އެންމެ އިސްކަމެއް ދޭނީ ބިންހިއްކުމުގެ މަޝްރޫޢަށް ކަމަށާއި، އެއީ އެ ރަށުގެ ރައްޔިތުންނަށް މިވަގުތު އެންމެ ބޭނުންޖެހިފައިވާ ކަންތައް ކަމުގައި އެ މަނިކުފާނު ވިދާޅުވިއެވެ.