މާއެނބޫދޫގެ އިސްވެރިންނާ ރައީސުލްޖުމްހޫރިއްޔާ ބައްދަލުކުރައްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދ އަތޮޅަށް ކުރިއްވަމުންގެންދަވާ ދަތުރުފުޅުގެ ތެރެއިން، އެ ރަށުގެ ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ ކޮމީޓީ އަދި ރަށުގެ މުއައްސަސާތަކުގެ އިސްވެރިންނާ މިއަދު ބައްދަލުކުރައްވައިފިއެވެ. މި ބައްދަލުކުރެއްވުން އޮތީ މާއެނބުދޫ ކައުންސިލް އިދާރާގައެވެ.

މި ބައްދަލުވުމުގައި މަޝްވަރާ ކުރެވުނީ ރައްޔިތުންނަށް އިޖުތިމާޢީ ގޮތުން ދިމާވެފައިވާ ދަތިތަކާ ގުޅިގެންނާއި، ރަށުގެ ތަރައްޤީގެ މަޝްރޫޢުތަކާ ގުޅިގެންނެވެ. 

މި ބައްދަލުކުރެއްވުމުގައި މާއެނބޫދޫގެ ކައުންސިލުން އެދިލެއްވީ، އެ ރަށުގެ ތަރައްޤީއަށް މިހާރު ކުރިޔަށް ގެންދަވާ މަޝްރޫޢުތައް ހުއްޓުމެއް ނެތި ކުރިޔަށް ގެންދެވޭނެ ގޮތަކަށް އިންތިޒާމުތައް ހަމަޖެއްސުވުމަށެވެ. މީގެ އިތުރުން، އެ ރަށަށް ދިމާވެފައިވާ އިންޓަނެޓުގެ މައްސަލައަށް ޙައްލު ހޯއްދަވައި، ދެމެހެއްޓެނިވި ގޮތެއްގައި ކުނި މެނޭޖުކުރެވޭނެ ގޮތްތަކެއް ހައްދަވައިދެއްވުމަށް އެދިވަޑައިގެންނެވިއެވެ.

މީގެ އިތުރުން، ޒުވާނުން ކުޅިވަރު ކުޅޭނެ ވަސީލަތްތައް ޤާއިމްކުރުމާ ގުޅޭ ގޮތުން ވެސް މަޝްވަރާކުރެވުނެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ އެ ރަށުގައި މިހާރު ހުއްޓިފައިވާ މަޝްރޫޢުތައް ކުރިޔަށް ގެންދިއުމަށް ކުރައްވަމުން ގެންދަވާ މަސައްކަތްތަކުގެ އަދާހަމަ މަޢުލޫމާތު ޙިއްސާކުރައްވާފައެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާގެ އަރިހުގައި ބައިވެރިވެވަޑައިގެންނެވި ބައެއް ވަޒީރުންނާއި ބައެއް ކުންފުނިތަކުގެ ވެރިން ވަނީ ރަށުގައި ހިންގާ މަޝްރޫޢުތަކުގެ އެންމެ ފަހުގެ މަޢުލޫމާތުތައް ހިއްސާކުރައްވާފައެވެ.

މި ބައްދަލުކުރެއްވުމުގެކުރިން ރައީސުލްޖުމްހޫރިއްޔާ ވަނީ ދ. މާއެނބޫދޫ ޞިއްޙީ މަރުކަޒުގެ އެކްސްޓެންޝަން އިމާރާތް ހުޅުއްވައިދެއްވާފައެވެ. އަދި އެމަނިކުފާނު ވަނީ އެރަށުގައި އަލަށް ޤާއިމުކުރި ބޭންކް އޮފް މޯލްޑިވްސްގެ އޭ.ޓީ.އެމްގެ ޚިދުމަތް ރަސްމީކޮށް ފައްޓަވައިދެއްވާފައެވެ.