ރަށްރަށުގައި ހުއްޓިފައި ހުރި ހުރިހާ މަޝްރޫޢެއް މާޗު މަސް ނިމުމުގެ ކުރިން ފައްޓަވާނެކަމުގައި ވިދާޅުވެއްޖެ

ރަށްރަށުގައި ހުއްޓިފައި ހުރި ހުރިހާ މަޝްރޫޢެއް މި އަހަރުގެ ފެބުރުއަރީ އަދި މާޗު މަހުގެ ތެރޭގައި ފައްޓަވާނެކަމަށް ރައީސުލްޖުމްހޫރިއްޔާ ތަކުރާރުކޮށް ދަންނަވައިފިއެވެ.

އެ މަނިކުފާނު މިހެން ވިދާޅުވީ، ދ އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ދ. މާއެނބޫދޫގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.

މި މޭރުމުން ވާހަކަފުޅު ކުރިޔަށް ގެންދަވަމުން ރައީސުލްޖުމްހުރިއްޔާ ވިދާޅުވީ، މި އަހަރުގެ ރިޔާސީ ބަޔާނުގައި ވެސް އެވާހަކަ ދަންނަވާފައިވާނެ ކަމަށާއި، އަދި އަނެއްކާވެސް ޖެހިލުމެއް ނެތި އެވާހަކަ ތަކުރާރުކުރައްވަނީ ކަމުގައެވެ.

ރައްޔިތުންގެ މަޖިލީހުގައި އަޅުގަނޑު އިއްވި ރިޔާސީ ބަޔާނުގައި އަޅުގަނޑުވާނެ ދަންނަވާފަ ވަރަށް ސާފުކޮށް، ހުރިހާ ރަށެއްގައި ވެސް ހުއްޓިފަ ހުރި މަޝްރޫޢުތައް ރީސްޓާޓް ވެގެން ދާނެއޭ މި ދެ މަސް ތެރޭގައި، ފެބްރުއަރީ އަދި މާޗު ތެރޭގައި. އެ ވަޢުދު އިރާދަކުރެއްވިއްޔާ ފުދިގެން ދާނެ.

ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ މިކަމުގެ ޔަޤީންކަން ދެއްވަމުން ވިދާޅުވީ، ސަރުކާރާއި ސަރުކާރު ހިއްސާވާ ކުންފުނިތައް ވަރުގަދަ ޓީމެއްގެ ގޮތުގައި މި ކަންކަން ތަންފީޒުކުރުމަށް ގިނަގުނަ މަސައްކަތްތަކެއް ކުރައްވަމުން ގެންދަވާ ކަމަށެވެ. 

އެގޮތުން ރާއްޖޭގެ އެކިކަންކޮޅުތަކުގައި ފެށުމަށްފަހު ހުއްޓިފައިހުރި މަޝްރޫޢުތައް އެކީގައި ފައްޓަވާނެކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.