Ads by Exprox

ޚަބަރު

މީދޫގެ ތަރައްޤީއާ ގުޅޭ ގިނަ އެއްބަސްވުންތަކެއްގައި ސޮއިކޮށްފި

މީދޫގެ ތަރައްޤީއާ ގުޅޭ ގިނަ އެއްބަސްވުންތަކެއްގައި ސޮއިކޮށްފި

މީދޫއާ ގުޅޭ އެއްބަސްވުންތަކުގައި ސޮއިކުރެއްވުން، ފޮޓޯ: ޙަސަން އިޔާދު/ފަރުދުން

މިފްތާޙް މުޙައްމަދު

މިފްތާޙް މުޙައްމަދު

24 ފެބްރުއަރީ 2025، 10:09

24 ފެބްރުއަރީ 2025، 10:09

ދ. މީދޫގެ ތަރައްޤީ އާއި ގުޅޭ ހަތަރު އެއްބަސްވުމެގައި، އެ ރަށުގައި ސޮއިކޮށްފިއެވެ.

މި އެއްބަސްވުންތަކުގައި ސޮއިކޮށްފައިވަނީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދ އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި، އެ އަތޮޅު މީދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރެއްވުމަށް މިރޭ ބާއްވާ ޖަލްސާގައެވެ. 

އެގޮތުން ފުރަތަމަ ސޮއިކުރެއްވީ މީދޫގައި ވެމްކޯގެ ވޭސްޓް މެނޭޖުމެންޓު ސެންޓަރެއް ޤާއިމްކުރުމުގެ އެއްބަސްވުމުގައެވެ.

މި އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ، މިނިސްޓަރ އޮފް ޓޫރިޒަން އެންޑް އެންވަޔަރޮމެންޓް، އަލްފާޟިލް ޠާރިޤު އިބްރާހިމްއެވެ. އަދި ވޭސްޓް މެނޭޖުމެންޓު ކޯޕަރޭޝަން ލިމިޓެޑުގެ މެނޭޖިން ޑިރެކްޓަރ، އަލްފާޟިލް މުޖުތަބާ ޖަލީލެވެ.

އެ ޖަލްސާގައި ދެން އޮތީ މީދޫގެ މަގުތައް ޒަމާނީ ފެންވަރަށް ތަރައްޤީ ކުރުމުގެ އެއްބަސްވުމުގައި ސޮއިކުރުމެވެ. މި އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ މިނިސްޓަރ އޮފް ހައުސިން، ކޮންސްޓްރަކްޝަން އެންޑް އިންފްރާސްޓްރަކްޗަރ، ޑޮކްޓަރ ޢަބްދުލް މުއްޠަލިބެވެ. އަދި މި މަސައްކަތް ހަވާލުކޮށްފައިވާ ރޯޑު ޑިވެލޮޕްމެންޓް ކޯޕަރޭޝަން ލިމިޓެޑް، އާރުޑީސީގެ ފަރާތުން ސޮއިކުރެއްވީ މެނޭޖިން ޑިރެކްޓަރ، ބްރިގޭޑިއާ ޖެނެރަލް، (ރިޓަޔަޑް) ޢަލީ ޒުޙައިރެވެ.

މި އެއްބަސްވުމުގެ ދަށުން އެ ރަށުގެ 14 މަގެއް ތަރައްޤީ ކުރުމަށް ވަނީ ނިންމާފައެވެ. އަދި ރަށުގެ ހިއްކާފައިވާ ސަރަޙައްދު ރަށުގެ ފަސްގަނޑަށް ވުރެން އުސްވުމުން، އެކަމުގެ ސަބަބުން ވިއްސާރަ މޫސުމުގައި ރަށުތެރޭގައި ފެން ބޮޑުވެދާނެތީ، އެކަން ޙައްލުކުރުން ވެސް ހިމެނެއެވެ.

އަދި މި ޖަލްސާގައި ވަނީ މީދޫ ބަނދަރު އަޕްގްރޭޑް ކުރުމުގެ ދެވަނަ ފިޔަވަހީގެ އެއްބަސްވުމުގައި ވެސް ސޮއިކޮށްފައެވެ. މި އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ މިނިސްޓަރ އޮފް ހައުސިން، ކޮންސްޓްރަކްޝަން އެންޑް އިންފްރާސްޓްރަކްޗަރ، ޑޮކްޓަރ ޢަބްދުލްމުއްޠަލިބެވެ. މި މަސައްކަތް ހަވާލުކޮށްފައިވާ، މޯލްޑިވްސް ޓްރާންސްޕޯޓު އެންޑް ކޮންޓްރެކްޓިން ކޮމެޕެނީ، އެމްޓީސީސީން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރ، ޑެޕިއުޓީ ކޮމިޝަނަރ އޮފް ޕޮލިސް، (ރިޓަޔަޑް) އަޙުމަދު ސައުދީއެވެ. 

މީގެ އިތުރުން، ދ އަތޮޅުގެ ރައްޔިތުން ޕިކުނިކުދާނެ ރަށެއްގެ ގޮތުގައި ދ. އުއްދޫ ހަމަޖެއްސެވުމަށް، އެ ރަށް ވަނީ މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރ އިން، މިނިސްޓްރީ އޮފް ސިޓީސް، ލޯކަލް ގަވަންމެންޓް އެންޑް ޕަބްލިކް ވޯކްސްއާ ހަވާލުކޮށްފައެވެ. 

އުއްދޫގެ ބެލެނިވެރިފަރާތް ބަދަލުކުރުމުގެ އެއްބަސްވުމުގައި ސޮއިކުރެއްވީ މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރ، ޑޮކްޓަރ މަރިޔަމް މާރިޔާ އާއި މިނިސްޓަރ އޮފް ސިޓީސް، ލޯކަލް ގަވަންމެންޓް އެންޑް ޕަބްލިކް ވޯކްސް، އަލްފާޟިލް އާދަމް ޝަރީފް ޢުމަރެވެ. 

އުއްދޫއަކީ ކުރިން ވިޔަފާރީގެ ބޭނުމަށް ދޫކޮށްފައި އޮތް ރަށެކެވެ.

މި ލިޔުން ކިޔާލުމުން

Ads by MSS