އެޕްރީލް މަހުން ފެށިގެން ހެޔޮއަގުގައި އެސްޓީއޯއިން ހުރިހާ ބޭހެއް ލިބެން ހުންނާނެކަމަށް ވިދާޅުވެއްޖެ

މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ)ގެ އެޕްރޫވްޑް މެޑިސިން ލިސްޓުގައި ހިމެނޭ ހުރިހާ ބޭހެއް، މި އަންނަ އެޕްރީލް މަހުން ފެށިގެން ސްޓޭޓް ޓްރޭޑިންގ އޯގަނައިޒޭޝަން (އެސް.ޓީ.އޯ) ގެ ބޭސްފިހާރަތައް މެދުވެރިކޮށް ލިބޭނޭކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

އެ މަނިކުފާނު މިހެން ވިދާޅުވީ، ނިލަންދެއަތޮޅު ދެކުނުބުރީގެ ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި އެ އަތޮޅު މީދޫއަށް ވަޑައިގެން އެ ރަށު ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ، މާރިޗު މަހުގެ 15 ވަނަ ދުވަހުން ފެށިގެން އެމްއެފްޑީއޭގެ އެސެންޝަލް މެޑިސިން ލިސްޓުގައި ހުރި ހުރިހާ ބޭހެއް ލިބެންފަށާނެ ކަމަށެވެ. އަދި އެ އޮތީރިޓީގެ އެޕްރޫވްޑް މެޑިސިން ލިސްޓުގައި ހިމެނޭ ހުރިހާ ބޭހެއް އެޕްރިލް 15 ވަނަ ދުވަހުން ފެށިގެން ހެޔޮއަގުގައި ލިބޭނެކަމަށް ރައީސުލްޖުމްހޫރިއްޔާ ވިދާޅުވިއެވެ.

މި މޭރުމުން ވާހަކަފުޅު ދައްކަވަމުން ރައީސް ވިދާޅުވީ، ބޮޑު ފައިދާއެއް ނެގުމުގެ ނިޔަތުގައި ބައެއް ފަރާތްތަކުން ކުރި ބޭހުގެ ވިޔަފާރިތައް މިހާރު ނިމުމަކަށް ގެނެވިފައިވާކަމަށެވެ. އަދި މި ފަހަކަށް އައިސް ކުރިމަތިވި ބޭހުގެ ދަތިކަމަކީ، ސީދާ މި ކަމުގެ ސަބަބުން ކުރިމަތިކުރުވި ދަތިކަމެއްކަމަށް އެ މަނިކުފާނު ވިދާޅުވިއެވެ. އެހެންނަމަވެސް އެއްވެސް ފަރާތަކުން، ރައްޔިތުންނަށް ދަތިކުރުމުގެ ފުރުޞަތު މި ސަރުކާރަކުން ނުދެއްވާނޭކަމަށް އެމަނިކުފާނު ވިދާޅުވިއެވެ.

އެހެންވީމަ ޕްރައިވެޓް ސެކްޓަރއިން އުނދަގޫކުރުމަށް މިކުރި މަސައްކަތް އެއްކޮށް އަޅުގަނޑުމެން ހައްލުކުރާނަން. އެމީހުން މިހުރިހާ ދުވަހު އާސަންދައިން އެތައް ސަތޭކަ 1000، 2000 ޕަސެންޓު ފައިދާ ރައްޔިތުންގެ ފައިސާއިން ޑްރޭންކުރަމުންދިޔައީ. ފެނިވަޑައިގަންވާނެ ރަށެއްގައި ކުޑަ ބޭސްފިހާރައެއް ހުޅުވާލާ މީހާވެސް އަހަރުނުވާނެ ބޮޑެތި މަސްދޯނިތައް ބަންނާނެ. މިއީ ހަގީގަތް. އެކަން ހުއްޓުވާލީމަ މައްސަލަޖެހުނީ. ސަރުކާރުން ބޭސް ގެނައުމުގައި ނޫން. ރައްޔިތުންގެ ހެވާއި ލާބަޔަށް އެ އިސްރާފު ހުއްޓުވީ.

ރައީސުލްޖުމްހޫރިއްޔާ ވިދާޅުވިއެވެ.

އަދި ބޭހުގެ އިސްރާފުން 500 މިލިއަން ސަލާމަތް ކުރެވި، އެ ފައިސާ ތަރައްޤީއަށް ހޭދަކުރެވޭނެކަމަށް ރައީސް ވަނީ ވިދާޅުވެފައެވެ.