ޚަބަރު
ހައުސިން ޔުނިޓު އަޅާ ކޮންމެ ރަށެއްގައި ވެސް އަމިއްލަ ގޯތީގައި ގެ އެޅުމުގެ ފުރުސަތު އޮންނާނެ: ރައީސުލްޖުމްހޫރިއްޔާ

ހއ. ދިއްދޫގައި ކުރިޔަށްދާ ހައުސިން ޔުނިޓުތަކުގެ ޑިޒައިން، ފޮޓޯ: އެސްޖޭ
ސަރުކާރުގެ ބޯހިޔާވަހިކަމުގެ މަޝްރޫޢުގެ ދަށުން ހައުސިން ޔުނިޓުތައް އެޅުމަށް ކަނޑައަޅާފައިވާ ހުރިހާ ރަށެއްގައި ވެސް، އަމިއްލަ ގޯތީގައި ގެ އެޅުމުގެ ފުރުސަތު އޮންނާނެކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ، އެ މަނިކުފާނު މިހާރު ދ އަތޮޅަށް ކުރައްވަމުން ގެންދަވާ ދަތުރުފުޅުގައި އެ އަތޮޅު މީދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައެވެ.
މި ފުރުސަތު އޮތްކަން ރައީސް އެންމެ ފުރަތަމަ އިޢުލާން ކުރެއްވީ ދ. ކުޑަހުވަދޫގެ ރައްޔިތުންނާ ބައްދަލުކުރައްވަމުންނެވެ. އަދި އޭރު އިތުރު ރަށެއްގައި މި ފުރުސަތު އޮންނާނެކަމަށް ހާމަކުރައްވާފައެއް ނުވެއެވެ. ނަމަވެސް ރޭ މީދޫގައި އެ މަނިކުފާނު ވިދާޅުވީ، އެއީ ހައުސިން މަޝްރޫޢު ހިންގާ ކޮންމެ ރަށެއްގައި ވެސް އޮތް ފުރުސަތެއް ކަމުގައެވެ.
ސަރުކާރުން އިޢުލާންކޮށްފައިވާ ގޮތުގައި، މީދޫގައި އެޅުމަށް ހަމަޖެހިފައިވަނީ 200 ހައުސިން ޔުނިޓެވެ. އަދި މި މަޝްރޫއަކީ 3 ކޮޓަރީގެ އެޕާޓްމެންޓް އެޅުމަށް ހިންގާ މަޝްރޫޢެއް ކަމުން، ގެ އިމާރާތްކުރުމުގައި ވެސް އަމަލުކުރެވޭނީ އެހެންކަމަށް ރައީސް ވަނީ ވިދާޅުވެފައެވެ.
މި ޕްރޮޖެކްޓުގައި މިއަޅަނީ 3 ކޮޓަރީގެ އެޕާޓްމަންޓްތަކެއް. އޭގެ ބައެއް ކަނޑައެޅިދާނޭ ރައްޔިތުން ބޭނުންވާނަމަ ބޭނުންވާ ރައްޔިތުންގެ ގޯތީގައި 3 ކޮޓަރީގެ ގެއެއް އަޅާދެވިދާނޭ. އެމީހާގެ އަމިއްލަ ގޯތީގައި އެގެ ގާއިމްކުރެވޭނީ. އެގޮތަށް ކަނޑައަޅާ ނިމުނީމަ މި ޕްރޮޖެކްޓުގެ ދަށުން ހައުސިން މަޝްރޫޢު ކުރިއަށްގެންދާނީ މަޝްރޫޢު ކުރިއަށްގެންދާ ސަރަހައްދުގައި.
ރައީސުލްޖުމްހޫރިއްޔާ ވިދާޅުވިއެވެ.
މީދޫ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް ވިދާޅުވީ، ހައުސިން ޔުނިޓް އެޅުމަށް އިޢުލާންކުރި ކޮންމެ ރަށެއްގައި ރަމަޟާން މަސް ނިމުމުގެ ކުރިން އަމިއްލަ ގޯތީގައި ހައުސިން ޔުނިޓް އަޅަންބޭނުންވާނަމަ އެކަން ސަރުކާރަށް އެންގުމަށެވެ. އަދި އެ ރަށްރަށުގައި އަޅާނެ ހައުސިން ޔުނިޓުތަކުގެ އަދަދު ނިންމާނީ ގޯތީގައި ގެ އަޅައިދިނުމަށް އިސްކަން ދެއްވުމަށްފަހުކަމަށް ރައީސް ވިދާޅުވިއެވެ.
ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ދިވެހިރާއްޖޭގެ 57 ރަށެއްގައި 12،000 އަށްވުރެ ގިނަ ހައުސިންގ ޔުނިޓު ތަރައްޤީކޮށްދޭނެ ކޮންޓްރެކްޓަރުން ހޯދުމަށް މިނިސްޓްރީ އޮފް ފިނޭންސް އެންޑް ޕްލޭނިންއިން އިޢުލާންކޮށްފައިވަނީ ޖެނުއަރީ މަހެވެ. މި މަޝްރޫޢިގެ ދަށުން 50 އާއި އެއަށްވުރެން މަދުން ހައުސިން ޔުނިޓްތައް އެޅުމަށް ނިންމާފައިވަނީ 18 ރަށެއްގައެވެ. އަދި 51 އާއި 150 ދެމެދުގެ އަދަދަކަށް ހައުސިން ޔުނިޓްތައް ތަރައްޤީކުރުމަށް 17 ރަށެއް ކަނޑައަޅާފައިވާެިރު، 200-250 އާ ދެމެދުގެ އަދަދަކަށް ހައުސިން ޔުނިޓްތައް ތަރައްޤީ ކުރަނީ 10 ރަށުގައެވެ. އަދި 300 އަށްވުރެ ގިނައިން ހައުސިން ޔުނިޓްތައް ތަރައްޤީ ކުރަނީ 12 ރަށެއްގައެވެ.