Ads by Exprox

ޚަބަރު

މަސްވެރިންނަށް ވެސް ރޯދަ އިނާޔަތް ދިނުމަށް މަސައްކަތްކުރަނީ

މަސްވެރިންނަށް ވެސް ރޯދަ އިނާޔަތް ދިނުމަށް މަސައްކަތްކުރަނީ

މަސްވެރިންތަކެއް މަސްބޭނުމުގެ މަސައްކަތުގައި، ފޮޓޯ: މަސްވެރިން އޮންލައިން

މިފްތާޙް މުޙައްމަދު

މިފްތާޙް މުޙައްމަދު

25 ފެބްރުއަރީ 2025، 07:43

25 ފެބްރުއަރީ 2025، 07:43

އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެމްބަރުންނަށް ރޯދަމަހުގެ އިނާޔަތް ލިބޭނެ އިންތިޒާމް ހަމަޖެއްސެވި ފަދައިން، މަސްވެރިންނަށް ވެސް ރޯދަ އިނާޔަތް ދެވޭނެ އިންތިޒާމެއް ހަމަޖެއްސެވުމަށް ސަރުކާރުން މަސައްކަތްކުރައްވަމުންދާކަމަށް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. 

އެ މަނިކުފާނު މިހެން ވިދާޅުވީ، ދ އަތޮޅަށް ކުރައްވަމުން ގެންދަވާ ދަތުރުފުޅުގައި އެ އަތޮޅު މީދޫއަށް ވަޑައިގެން ރޭ ބޭއްވެވި ޖަލްސާގައެވެ.

މި މަޢުޟޫއަށް ވާހަކަފުޅު ކުރިޔަށް ގެންދަވަމުން ރައީސުލްޖުމްހޫރިއްޔާ ވިދާޅުވީ، އިތުރު ފަންނުތަކުގެ ބޭފުޅުންނަށް ވެސް ރޯދަ އިނާޔަތް ހަމަޖައްސަވައިދެއްވަން ބޭނުންފުޅުވާ ކަމަށެވެ. އެގޮތުން އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެމްބަރުންނަށްފަހު ދެން އެންމެ އިސްކަމެއް ދެއްވަނީ މަސްވެރިންނަށް މި ފައިސާ ދެއްވުމަށްކަމަށާއި، އެގޮތުން މަސްވެރިންގެ ދަފްތަރެއް އެކުލަވާލާފައިވާކަމަށް ވެސް އެ މަނިކުފާނު ވިދާޅުވިއެވެ.

އެ ދަފްތަރުގައި ޖެހިގެން ބޭންކިން ނިޒާމުން ލޯނު ނެގުމާއި އެސްޓީއޯގެ ކްރެޑިޓް ސްކީމުން އެހީތެރިކަން ލިބުން ފަދަ ކަންކަން ފަހިވެގެންދާނެ މިއަހަރު ތެރޭގައި.

މަސްވެރިންގެ ދަފްތަރަށް އިޝާރާތްކުރައްވަމުން ރައީސުލްޖުމްހޫރިއްޔާ ވިދާޅުވިއެވެ.

ރޯދަ އިނާޔަތުގެ ވާހަކަ ކުރިޔަށް ގެންދަވަމުން ރައީސުލްޖުމްހޫރިއްޔާ އިތުރަށް ވިދާޅުވީ، މި ހަފްތާ ނިމުމުގެ ކުރިން އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެމްބަރުންނަށް ރޯދަމަހުގެ އިނާޔަތް ޖަމާކޮށްދެއްވުމަށް ފިނޭންސް މިނިސްޓްރީން ކައުންސިލްތަކަށް އަންގަވާފައިވާކަމަށެވެ.

އަޅުގަނޑު މިރޭ މަރުހަބާ ދަންނަވާލަން ބޭނުން ޑަބްލިޔުޑީސީތަކުގެ މެމްބަރުންނަށް. ޑަބްލިޔުޑީސީތަކުގެ މެމްބަރުންނަށް އަޅުގަނޑު ވައުދުވީ ރަމަޟާންމަހުގެ އިނާޔަތް ލިބޭނެ ގޮތް ހަމަޖައްސައިދޭނަމޭ. ޤާނޫނީ ހުރަސްތަކެއް ހުރީމަ މަޖިލިސް ތެރެއިން އެކަން ކޮށްދޭނަމޭ. އެކަން ހަމަޖައްސައިދީ މިހާރު އެދަނީ ޑަބްލިޔުޑީސީތަކުގެ މެމްބަރުންނަށް ރަމަޟާންމަހުގެ އިނާޔަތް ޖަމާވަމުން.

ރައީސުލްޖުމްހޫރިއްޔާ ވިދާޅުވިއެވެ.

އަދި މަސްވެރިންގެ އިތުރުން ދެންހުރި ފަންނުތަކުގެ ބޭފުޅުންނަށް ވެސް ރޯދަ އިނާޔަތް ލިބެންޖެހޭނެ ކަމަށާއި، އެކަމަށް ސަރުކާރުން މަސައްކަތްކުރައްވާކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.

މި ލިޔުން ކިޔާލުމުން

Ads by MSS