ރިނބުދޫގެ ސެލްފް ސާރވިސް އޭޓީއެމްގެ ޚިދުމަތް މިއަދު ހެނދުނު ފަށައިފި

ރިނބުދޫގައި ސެލްފް ސާރވިސް އޭޓީއެމްގެ ޚިދުމަތް ބޭންކް އޮފް މޯލްޑިވްސުން މިއަދު ހެނދުނު ފައްޓަވައިދެއްވައިފިއެވެ. 

މިއަދު ހެނދުނު ދ. ރިނބުދޫގައި ބޭއްވި ރަސްމިއްޔާތުގައި އައު ސެލްފް ސާރވިސް ބޭންކިންގް އޭޓީއެމް ޚިދުމަތް އިފްތިތާހްކޮށްދެއްވާފައި ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ. 

”މުޅި ރާއްޖޭގައި ބޭންކިންގ ޚިދުމަތް ފުޅާކުރުމުގެ މަސައްކަތުގެ ތެރެއިން، ރިނބުދޫގައި ސެލްފް ސަރވިސް ބޭންކިންގ ޚިދުމަތް ތަޢާރަފުކުރެވުމަކީ ލިބުނު އުފަލެއް. މި ޚިދުމަތުގެ ސަބަބުން ރަށުގެ ރައްޔިތުންނަށް ފަސޭހަކަމާއެކު ފައިސާ ނެގުމާއި ޑިޕޮސިޓް ކުރުމާއި ފައިސާ ދެއްކުން ފަދަ ދުވަހުން ދުވަހަށް ކުރަންޖެހޭ ބޭންކިންގ މުޢާމަލާތްތައް ފަސޭހަކަމާއެކު 24 ގަޑިއިރު ކުރެވޭނެ.“ ބޭންކް އޮފް މޯލްޑިވްސްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވިދާޅުވިއެވެ.

ރާއްޖޭގެ މީހުން ދިރިއުޅޭ ކޮންމެ ރަށެއްގައި އޭޓީއެމް ބެހެއްޓުމަކީ މި ސަރުކާރުގެ އަމާޒެއްކަމަށް ސަރުކާރުން ވަނީ ނިންމަވާފައެވެ. މި ނިންމެވުމާ އެއްގޮތަށް ރިނބުދޫގައި އޭޓީއެމް ޚިދުމަތް މިވަނީ ޤާއިމްކޮށްފައެވެ. މި އޭޓީއެމްގެ ޚިދުމަތް ފަށްޓަވައިދެއްވައި ރައީސުލްޖުމްހޫރިއްޔާ ވަނީ އެ އޭޓީއެމުން ފައިސާ ނަންގަވާފައެވެ. އެމަނިކުފާނުގެ އަރިހުގައި ބޭންކް އޮފް މޯލްޑިވްސް ސީއީއޯ މުހައްމަދު ޝަރީފް ވަނީ ބައިވެރިވެވަޑައިގެންފައެވެ.

މީގެ އިތުރުން ރައީސްގެ ދަތުރުފުޅުގެ ތެރެއިން މިއަދު ވަނީ ދ. ރިނބިދޫގައި އަލަށް އިމާރާތްކުރާ ކައުންސިލް އިދާރާގެ ބިންގާ ވެސް އަޅުއްވައިދެއްވާފައެވެ. މި މަޝްރޫޢު ކުރިއަށްދަނީ ސަރުކާރުގެ ބަޖެޓުން ޚަރަދުކުރާ ގޮތަށް، ކޮންޓްރެކްޓް ފައިނޭންސް އުސޫލުންކަމަށް ވެސް ސަރުކާރުން ހާމަކޮށްފައިވެއެވެ. 

މި އިމާރާތް ވެގެން ދާނީ ޖާގަ ތަނަވަސް، ކައުންސިލަރުންނާ އިދާރީ މަސައްކަތްތަކަށް ވެސް ފަހިވާނެގޮތަށް، ވަސީލަތްތައް ހަމަކުރެވިފައިވާ އިދާރާއަކަށް ކަމަށާއި، މި ޕްރޮޖުކްޓުގެ މަސައްކަތް 2 އަހަރާ 6 މަސް ދުވަހުގެ ތެރޭގައި ނިމިގެން ދާނެކަމަށް ވެސް ސަރުކާރުން ވިދާޅުވެފައިވެއެވެ.