ދ އަތޮޅަށް ކުރެއްވެވި ދަތުރުފުޅު ނިންމަވާލެއްވުމަށްފަހު ރައީސް މާލެ ވަޑައިގެންފި

ދ އަތޮޅުގެ މީހުން ދިރިއުޅޭ ހުރިހާ ރަށަކަށް ކުރެއްވެވި ދަތުރުފުޅު ނިންމަވާލެއްވުމަށްފަހު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މާލެ ވަޑައިގެންފިއެވެ.

މިދިޔަ އާދީއްތަ ދުވަހު ރައީސް ފެއްޓެވި މި ދަތުރުފުޅުގައި އެމަނިކުފާނު ވަނީ އެ އަތޮޅު ކުޑަހުވަދޫ، މާއެނބޫދޫ، ބަނޑިދޫ، މީދޫ، ރިނބުދޫ އަދި ހުޅުދެއްޔަށް ވަޑައިގެންފައެވެ. އަދި އެ ރަށްރަށުގެ ކައުންސިލްތަކާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާއި، މުވައްސަސާތަކުގެ ވެރިން އަދި ރައްޔިތުންނާ ބައްދަލުކުރައްވައި، އެ ފަރާތްތަކުގެ ކަންބޮޑުވުންތައް އަޑުއައްސަވާފައިވެއެވެ.

މި ދަތުރުފުޅުގައި އެ އަތޮޅުގެ ރައްޔިތުންގެ އުއްމީދުތަކާ ގުޅިފައިވާ ގިނަ ނިންމެވުމުންތަކެއް ނިންމަވާ، ގިނަ ކަންތައްތަކެއް ވަނީ ފައްޓަވާދެއްވާފައެވެ.

އެގޮތުން  އޮޕަރޭޝަނަލް ވިޔަފާރި ބަނދަރެއްގެ ގޮތުގައި ދ. ކުޑަހުވަދޫ ވިޔަފާރި ބަނދަރު ހައްދަވައިދެއްވާނެކަމުގެ ޔަޤީންކަން ކުޑަހުވަދޫ ރައްޔިތުންނަށް ރައީސުލްޖުމްހޫރިއްޔާ ދެއްވެވިއެވެ. އަދި ދ. ބަނޑިދޫ ބަނދަރުގެ ބޭރު ތޮށި ބަދަލުކުރުމުގެ މަސައްކަތާއި ބިންހިއްކުމުގެ ޢަމަލީ މަސައްކަތް، ލަސްވެގެން އަންނަ އަހަރު ފައްޓަވާނޭކަމަށް އެމަނިކުފާނު ވިދާޅުވިއެވެ. މީގެއިތުރުން މުޅި އަތޮޅުގެ ޢާންމު ރައްޔިތުންނަށް ދަތުރުގޮސް އުޅެވޭ ރަށެއްގެ ގޮތުގައި އެ އަތޮޅު އުއްދޫ ހަމަޖައްސަވާފައިވާކަން އެމަނިކުފާނު އިޢުލާންކުރެއްވީ މީދޫ ރައްޔިތުންނާ މުޚާޠަބުކުރައްވަމުންނެވެ.

މީގެއިތުރުން، ހުޅުދެލީގެ ބިންހިއްކުމުގެ މަސައްކަތް ލަސްވެގެން ޖުލައި މަހު ފައްޓަވާނޭކަމަށް ވެސް އެމަނިކުފާނު ވަނީ ވިދާޅުވެފައެވެ.

ރައީސުލްޖުމްހޫރިއްޔާގެ މި ދަތުރުފުޅުގައި ދ އަތޮޅުގެ ހުރިހާ އަތޮޅަކުން އޭޓީއެމްގެ ޙިދުމަތް ލިބޭނޭ ގޮތަށް، ކުރިން މި ޚިދުމަތް ނުލިބޭ ހުރިހާ ރަށެއްގައި އޭޓީއެމްގެ ޚިދުމަތް ވަނީ ފައްޓަވާދެއްވާފައެވެ. 

އަދި މަސައްކަތް ފެށުމަށްފަހު ހުއްޓިފައި ހުރި ހުރިހާ މަޝްރޫޢެއް، ފެބްރުއަރީ މަހާއި މާރިޗު މަހު، އަލުން ފައްޓަވާނޭކަމަށް އަނެއްކާވެސް ރައީސުލްޖުމްހޫރިއްޔާ ވަނީ ތަކުރާރުކުރައްވާފައެވެ.