އައު ކުޅިވަރުތަކާއެކު ސަލްޓަން ޕާކު އަލުން ތަރައްޤީކުރަނީ

ދިވެހިވަންތަކޮށް، ބޯލިން ފަދަ އައު ކުޅިވަރުތަކާ އެކު ސަލްޓަން ޕާކު އަލުން ތަރައްގީ ކުރުމުގެ މަސައްކަތް ވަރަށް އަވަހަށް ފަށާނެ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެއެވެ. 

ރަސްމީ ފާލަން އައުކޮށް، އެ ފާލަން ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ޑރ. މުޢިއްޒު ވިދާޅުވީ، ނިމިދިޔަ ސަރުކާރުގައި އެއްވެސް ވަރަކަށް އަޅާނުލައި ދޫކޮށްލާފައި ސަލްޓަން ޕާރކު އޮތް ނަމަވެސް، ސަރުކާރުން މިހާރު އެތަނާ ހަވާލުވެފައިވާ ކަމަށެވެ.

”އިރާދަ ކުރެއްވީތީ، މި އިއްޒުއްދީން ފާލަމުގައި މި ދައްކުވައިދޭ ރަމްޒު، ނޫނީ މީގެން މި ދޭހަކޮށްދޭ މެސެޖު، ސަލްޓަންޕާކު އަލުން ތަރައްގީވެގެން އަންނައިރު  ފެނިގެންދާނެ. އަޅުގަނޑުމެން އެތަން ތަރައްގީ ކުރާނީ ވެސް ހަމަ ދިވެހިންގެ އައިޑެންޓިޓީ ދައްކުވައިދޭ ގޮތަށް، ރާއްޖޭގެ ތާރީޚް އެތަނުން މިހާރުގެ ބަވަނަ ވެފައިވާ މި ދުނިޔޭގެ ޒަމާނީ ޓެކްނޮލޮޖީ ބޭނުންކޮށްގެން އަޅުގަނޑުމެންގެ ޅަ ދަރިންނަށް ޒުވާނުންނަށް އެ ފަރާތްތައް ހިތްހަމަޖެހޭ ޝައުގުވެރިކަމާ އެކު ދަސްވާނެ ގޮތަށް ބައްޓަން ކުރެވިގެންދާނެ،" ރައީސުލްޖުމްހޫރިއްޔާ ވިދާޅުވިއެވެ. 

ރައީސް ވިދާޅުވީ ސަލްޓަން ޕާކު ތަރައްގީ ކުރުމުގެ މަޝްރޫއު ކުރިއަށް އޮތް ހަ މަސް ތެރޭގައި ފެށޭނެ އެވެ. އެ މަޝްރޫއު ނިމުމުން ސަލްޓަން ޕާކު ސަރަހައްދަކީ ވަގުތު ހޭދަކޮށްލަން އެންމެ ހިތްފަސޭހަ އެންމެ ގިނަ ކަންކަން ކުރެވޭ ސަރަހައްދަށް ހެދިގެންދާނެ ކަމަށް ރައީސް ވިދާޅުވި އެވެ.

” އޭގެ އިތުރުން ވެސް ބޯލިން ފަދަ، މާލޭގައި މިވަގުތު ނެތް ކުޅިވަރުތަކާ، ތަންތަންވެސް އިތުރުކުރެވިގެން ދާނެ. އަދި އިތުރު ފީވާސްތައްވެސް ހިމެނިގެންދާނެ" ރައީސް ފާހަގަކުރެއްވިއެވެ. 

ރަސްރަނި ބަގީޗާއަކީ، ރައީސް ޔާމީނުގެ ދައުރުގައި، ރައީސް މުއިއްޒު ހައުސިންގ މިނިސްޓަރަކަށް ހުންނެވިއިރު އެ މަނިކުފާނުގެ ބެއްލެވުމުގެ ދަށުން ތަރައްޤީކުރެވުނު ތަނެކެވެ.