ހައުސިންގ ލޯނަށް އެތައް ހާސް ބަޔަކު ހުށައަޅައިފި، ލޯނު ދޫކުރުން މި އަހަރު މެދުތެރޭގައި

މާލެ އާއި ރާއްޖޭގެ އެކި ކަންކޮޅުތަކުން އެތައްހާސް ރައްޔިތުން ހައުސިން ލޯނަށް އެދި ހުށައަޅަމުންދާކަމަށް ރައީސް ޑރ. މުޙައްމަދު މުޢިއްޒު ރޭ ވިދާޅުވެއްޖެއެވެ. 

ޢިއްޒުއްދީން ފާލަން އަލުން ތަރައްޤީކޮށް އިފްތިތާޙުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ރައްޔިތުންނަށް ބޯހިޔާވަހިކަން ފޯރުކޮށްދިނުމުގެ އެންމެ މުހިންމު ވަސީލަތަކީ އިސްލާމިކް ފައިނޭންސް ލޯން ސްކީމް ކަމަށެވެ. އެގޮތުން ފަސް ޕަރސެންޓުގެ އިސްލާމިކް ފައިނޭންސް ލޯން ސްކީމަށް މިހާރުވެސް މާލެ އާއި ރާއްޖޭގެ އެކި ކަންކޮޅުތަކުން އެތައްހާސް ރައްޔިތުން ހުށައަޅަމުން ގެންދާ ކަމަށާއި، މި އަހަރުގެ މެދުތެރޭގައި، ހައުސިން ލޯނު ދޫކުރަން ފެށޭނެ ކަމަށެވެ. މާލޭގެ ރައްޔިތުންގެ ތެރެއިން ގޯތި އޮތް މީހަކު ނަމަ އެންމެބޮޑު އެހީތެރިކަމެއް، ނުވަތަ ގެދޮރުވެރިކަމެއް ދެވޭނީ އެ ލޯނު ސްކީމުގެ ދަށުންކަމަށް ވެސް ރައީސް ވިދާޅުވިއެވެ.

އެއީ، އެ މީހާގެ ގޯތީގައި ގެއެއް އެޅުމަށް، ނޫނީވިއްޔާ އަޅަން ފަށައި ނުނިމިހުރި ގެ ނިންމުމަށް، އެ ލޯނު ސްކީމްގެ ބޭނުންހިފޭނެތީ. ލުއި ލޯން ސްކީމެއް އެއީ. އިމާރާތް ކުރާ ތަން ރަޙުނުކޮށް އަދި އިކުއިޓީ ނުބަހައްޓައި، ވަރަށްލުއި ޓަރމްސްތަކެއްގެ އިސްލާމިކް ލޯން ސްކީމެއް އެއީ. ބެހެނިވެރިން އެކުވެގެން ދިހަ މިލިއަން ރުފިޔާއާ ހަމަޔަށް މާލޭގައި ވިއްޔާ ލޯނު ނެގޭނެ. އަދި ޖުމްލަކޮށް ހަ މިލިއަން ރުފިޔާ، ނޯމަލީ މާލޭ ސަރަޙައްދުގައި ލޯނު ނެގޭނެ.

ރައީސް ވިދާޅުވިއެވެ.

ހައުސިން ލޯނު ދޫކުރުމަށް މި އަހަރަށް 1 ބިލިއަން ރުފިޔާ ކަނޑައަޅާފައިވާ ކަމަށް ޑރ. މުޙައްމަދު މުޢިއްޒު ވިދާޅުވެފައިވެއެވެ. މި ފައިސާގެ ދަށުން، ވަރަށް ގިނަ ރައްޔިތުން މި އަހަރު ލޯނު ނަންގަވައިގެން އަމިއްލަ ގެ ހަދަން ފަށާނެ ކަމަށް އުއްމީދު ކުރަށްވާ ކަމަށާއި، މާލޭގައިވެސް ހައުސިންގ މަޝްރޫޢުތަކެއް ހިންގަން ވަނީ ނިންމާފައިވާކަމަށް ރައީސް ވިދާޅުވެފައިވެއެވެ. އެގޮތުން މާލެ އާއި ވިލިމާލެ އަދި ގުޅީފަޅުގައި މި އަހަރު ތެރޭގައި ޢަމަލީގޮތުން ގެދޮރުވެރިކަމުގެ މަޝްރޫޢުތަކެއް ފެށިގެންދާނެ ކަމަށް ރައީސް މުޢިއްޒު ވިދާޅުވިއެވެ.

އެ މަޝްރޫޢުތައް ފެށިގެންދާއިރުގައި، މާލެއިން ހައުސިންގ ޔުނިޓް، ސޯޝަލް ހައުސިންގ ޔުނިޓް ފޯރުކޮށްދިނުމުގައިވެސް އެބަ މަގުފަހިވޭ. އަދި ވިލިމާލެއިންވެސް. އަދިހުޅުމާލޭގައިވެސް އިރާދަކުރެއްވިއްޔާ މި އަހަރު މަސައްކަތްތައް ފެށޭނެ.

ރައީސް މުޢިއްޒު ވިދާޅުވިއެވެ.