ރަމަޟާން މަހު އުޅުމާއި ގުޅުމަށް ގެންނަ ބަދަލަކީ ދާއިމީ ކަމަކަށް ހެއްދެވެމުނަށް ރައީސުލްޖުމްހޫރިއްޔާ ނަސޭހަތްތެރިވެވަޑައިގެންފި

ރަމަޟާން މަހު އުޅުމާއި ގުޅުމަށް ގެންނަ ބަދަލަކީ ދާއިމީ ކަމަކަށް ހެއްދެވެމުނަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނަސޭހަތްތެރިވެވަޑައިގެންފިއެވެ.

އެމަނިކުފާނު މިކަމަށް އިލްތިމާސްކުރެއްވީ ބަރަކާތްތެރި ރަމަޟާން މަހުގެ ތަހުނިޔާއާއި ހެޔޮ އެދުންތައް ރައްޔިތުންނަށް އަރިސްކުރައްވައި ފޮނުއްވި ތަހުނިޔާގެ ޚިޠާބުގައެވެ.

އެގޮތުން ރޯދައަކީ އަޅުގަނޑުމެންނާ އަހަރަކު އެއް ފަހަރު ބައްދަލުކުރާ އަގުހުރި މެހުމާނެއް ކަމަށާއި، މި މެހުމާނާއެކު އުޅެން މި ލިބޭ މައްސަރުގައި އަޅުގަނޑުމެންގެ އުޅުމާއި ގުޅުންތަކަށް އަންނަ ހެޔޮ ބަދަލު މުޅި ހަޔާތުގައިވެސް ދެމެހެއްޓެވުމަށް އެ މަނިކު އެދިވަޑައިގެންނެވިއެވެ.

މީގެ އިތުރުން، މިއީ ޒުވާނުންނާއި ކުޑަ ކުދިންނަށް ނަމޫނާ ދެއްކުމުގެ މަހަކަށް ހައްދަވައި، ދޮގާއި ފިތުނަ ފަތުރަން މަސައްކަތްކުރާ ކޮންމެ ބަޔަކާ ދުރުހެލިވުމަށް ވެސް އެމަނިކުފާނު އެދިވަޑައިގެންނެވިއެވެ.

އަދި އަޅުގަނޑުމެންގެ ދަރީންނަށާއި، ކުޑަކުދިންނަށާއި ޒުވާނުންނަށް ރީތި ނަމޫނާ ދައްކައި، ހަރުދަނާ ސިފަތައް އުނގަންނައިދޭ މަހެއްކަމުގައި މި މަސް ހެއްދެވުމަށާއި، ދުންފަތުގެ އިސްތިޢުމާލުކުރުން ފަދަ އަމިއްލަ ނަފްސަށް ގެއްލުންހުރި ނުކިއްސަރު އާދަތަކާ ދުރުހެލިވުމުގެ ފުރަތަމަ ފިޔަވަޅު މި މަހު އެޅުއްވުމަށް ވެސް އެ މަނިކުފާނު އެދިވަޑައިގެންނެވިއެވެ.

"ދޮގާއި ފިތުނަ ފަތުރަން މަސައްކަތްކުރާ ކޮންމެ ބަޔަކާ ދުރުހެލިވެ، ޚުލްޤު ހެޔޮ އިންސާނެއްގެ ގޮތުގައި ކާމިޔާބު ޙަޔާތެއް އުޅުމުގެ ޢަޒުމު މި މަހު އައުކުރަމާތޯ. އިސްރާފުކުރުމާ، ވަގުތުގެ ނިޢުމަތް ބޭކާރުކުރުން ފަދަ ވަސްވާސްތަކާ ފެޔަށް ޖެހި، ފުދުންތެރި ދިރިއުޅުމެއް ޚިޔާރުކޮށް، މާދަމާއަށް ޓަކައި ދުނިޔަވީ އަދި އުޚްރަވީ ގޮތުން މަންފާހުރި އެތައް ޢަމަލަކާއި ހެޔޮކަމެއް ގޮވާންކުރުމުގެ އާދަ މިމަހު ހިފަން ފަށާމާތޯ" ރައީސްގެ ޚިތާބުގައި ވިދާޅުވިއެވެ.

އަދި، ދިވެހީންގެ ސިލްމާއި ސަލާމަތާއި ކާމިޔާބު ގުޅިފައިވަނީ މާތްވެގެންވާ އިސްލާމް ދީނާ ކަމަށާއި، ތިރި ޖަޒީރާ ރަށްތަކެއްގައި އާބާދުވެ ދިރިއުޅެމުންދާ މި ޤައުމުގެ ރައްޔިތުންނަށް ﷲ ދެއްވި ނިޢުމަތްތަކާއި، އަމާންކަމާއި، ރަޙްމަތުގެ ބޮޑުކަމުގެ ވާހަކަ އެ މަނިކުފާނު ފާހަގަކުރެއްވެވިއެވެ. 

މީގެ އިތުރުން، ދަތި ހާލުގައި ތިބި މުސްލިމުންނަށް ހެޔޮ ދުޢާކޮށްދީ، ހެޔޮ ފޯރުވައިދެއްވުަމަށް ވެސް އެމަނިކުފާނު އެދިވަޑާއިގެންފައިވެއެވެ. 

ރައީސުލްޖުމްހޫރިއްޔާގެ ޚިތާބު ނިންމަވާލެއްވީ ބަރަކާތްތެރި ރަމަޟާން މަހުގެ ފާގަތިކަމާ ބާއްޖަވެރިކަން ދިވެހި ޤައުމަށް އަބަދުމެ ތަކުރާރުކޮށްދެއްވައި، މި ލޮބުވެތި ވަޠަން އިސްލާމް ދީނުގެ ހިދާޔަތުގައި އަބަދުމެ ލެހެއްޓެވުމަށާއި ދިވެހި ރައްޔިތުންނަކީ ހެޔޮލަފާ ބަޔެއްގެ ގޮތުގައި އަބަދުމެ ލައްވައި، ވިޔަވަތި ދިރިއުޅުމެއް މިންވަރުކުރެއްވުމަށް ވަނީ ދުޢާކުރައްވާފައެވެ.