ޚަބަރު
ދިވެހި އަންހެން ދަރީންނަށްޓަކައި ދިވެހި ޤައުމު އަބަދުވެސް ފަޚުރުވެރިވާނެ: ރައީސުލްޖުމްހޫރިއްޔާ

އަންހެނުންގެ ދައުރާއި ވާގިވެރިކަން ނެތި އެއްވެސް ޤައުމެއް، ވަޠަނެއް، ދެމި ނޯންނާނެ ކަމުގައި ރައީސުލްޖުމްހޫރިއްޔާ ވިދާޅުވި: ފޮޓޯ: ރައީސް އޮފީސް
ހުލާސާ
ރާއްޖޭގެ މިނިވަންކަން އަނބުރާ ހޯއްދެވުމަށް ކުރެއްވެވި ކޮންމެ ޖިހާދެއްގައި ވެސް އަންހެނުންގެ ދައުރު އޮތްކަން ރައީސުލްޖުމްހޫރިއްޔާ ފާހަގަކުރެއްވެވި
ދިވެހި އަންހެން ދަރީންނަށްޓަކައި ދިވެހި ޤައުމު އަބަދުވެސް ފަޚުރުވެރިވާނެކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ، ބައިނަލްްއަޤްވާމީ އަންހެނުންގެ ދުވަހުގެ މުނާސަބަތުގައި ފޮނުއްވި ޚިޠާބުގައެވެ.
ރައީސުލްޖުމްހޫރިއްޔާގެ ޚިޠާބުގައި އެ މަނިކުފާނު ވިދާޅުވީ، ދިވެހި އަންހެންވެރިންގެ ހީވާގިކަމާއި، މުރާލިކަމާއި، ގެވެހިކަމާއި، ސާފުތާހިރުކަމަށް ލޯބިކުރުމާއި، ޤައުމީ އަދި އިޖުތިމާޢީ ކަންކަމުގައިދޭ ބޮޑު އަހައްމިއްޔަތުގެ ވާހަކަތައް ދިވެހި ތާރީޚުގެ އެންމެ އެވޭލާ ލިޔެކިޔުންތަކުގައިވެސް ފެންނާން ހުރިކަމަށެވެ. އެގޮތުން، ދިވެހި ރާއްޖޭގެ މިނިވަންކަން ގެއްލުނު ކޮންމެ ފަހަރަކު ވެސް، އެ މިނިވަންކަން އަނބުރާ ހޯއްދެވުމަށް ކުރެއްވެވި ކޮންމެ ޖިހާދެއްގައި ވެސް އަންހެނުންގެ ދައުރު އޮތްކަން ފާހަގަކުރެއްވެވިއެވެ.
މީގެ އިތުރުން އެ މަނިކުފާނު ވިދާޅުވީ، އަންހެނުންގެ ޙައްޤުތައް އެންމެ ހެޔޮގޮތުގައި ކަނޑައަޅައިދީ، މުޖުމަތަމަޢުގައި އަންހެނުންގެ ޤަދަރާއި ޢިއްޒަތާއި މަގާމު މަތިވެރިކޮށްދިނީ މާތްވެގެންވާ އިސްލާމްދީން ކަމަށެވެ. އެގޮތުން އަންހެނުންގެ ފުރާނަ އާއި ދިރިތިބުމުގެ ޙައްޤު ޙިމާޔަތްކޮށްދީ، ވާރުތަ މުދަލުން ބައި ލިބިދީ، އުނގެނުމާއި މަސައްކަތްކުރުމުގެ ޙައްޤު އިސްލާމްދީނުން ކަށަވަރުކޮށްދެއްވިކަމަށް ވިދާޅުވިއެވެ.
އަދި އިސްލާމް ދީނުގައި އަންހެނުންނަށް ދެއްވާފައިވާ ޤަދަރަށް އަލިއަޅުއްވާލަމުން ވިދާޅުވީ، އިންސާނާ އެންމެ ހެޔޮކޮށް ހިތައި އޯގާތެރިވާން ޖެހޭނެ އެއްވަނަ މީހަކީވެސް، ދެވަނަ މީހަކީވެސް، ތިންވަނަ މީހަކީވެސް އޭނާގެ މަންމަކަމުގައި މި އުއްމަތުގެ ނަބިއްޔާ مُحَمَّدُ صلى الله عليه وسلم އިރުޝާދުދެއްވާފައިވާކަމަށާއި، އެކަލޭގެފާނު ސުވަރުގެ ވަޑައިގެންނެވުމުގެ ކުރީން އެންމެ ފަހުން ވަޞިއްޔަތްޕުޅު ކުރެއްވި އެއްކަމަކީ، އަނބީންނަށް އޯގާތެރިވުން ކަމަށެވެ.
އަދި މުޖުތަމަޢުގެ ކުރިއެރުމުގައި އަންހެނުންގެ ދައުރު ބަޔާންކުރައްވަމުން ވިދާޅުވީ، ތަޢުލީމާއި، ޞިއްޙަތާއި، އިޖުތިމާޢީ މި ނޫން ޚިދުމަތްތަކާއި، ވެރިކަން ހިންގުމާއި، ވިޔަފާރިއާއި އިޤްތިޞާދީ މަސައްކަތްތަކާއި އަދި މި ނޫނަސް މުޖުތަމަޢެއްގެ ދިރުމާއި ކުރިއެރުމާ ގުޅިފައިވާ ކޮންމެ ކަމެއްވެސް ހިނގަމުންދާނީ، އަދި ކާމިޔާބުވެ ކުރިއަރާނީ އަންހެނުންގެ ފުރިހަމަ ބައިވެރިވުމާއެކީގައި ކަމަށެވެ.
އެ މަނިކުފާނު ވިދާޅުވީ، ދިވެހި ސަރުކާރުގެ އެންމެ އިސް އެއް ސިޔާސަތަކީ، މުޖުމަތަޢުގައި އަންހެން ދަރީންނަށް އޮތް ފުރުޞަތުތައް އިތުރަށް ފަހިކޮށްދީ، ސަރުކާރު ހިންގުމުގައި އަންހެނުންގެ ޙިއްޞާ އިތުރުކޮށް، އަންހެނުންނަކީ ފުދުންތެރި ބާރުވެރި ބަޔަކަށް ހެދުން ކަމަށެވެ.
އެ މަނިކުފާނުގެ ޚިޠާބު ނިންމަވާލެއްވުމުގެ ކުރިން ވަނީ، ދިވެހި އަންހެނުން އެކި ރޮނގުރޮގުން ހޯއްދަވަމުން ގެންދަވާ ކާމިޔާބީތައް ފާހަގަކުރައްވާ، އެ ކަނބަލުންނަށް ޤައުމު އަބަދުވެސް ފަޚުރުވެރިވާނެކަމަށް ވިދާޅުވެފައެވެ.