ޚަބަރު
ބައިނަލްއަޤްވާމި އަންހެނުންގެ ދުވަހުގެ ތަޙުނިޔާ ރައީސުލްޖުމްހޫރިއްޔާ ފޮނުއްވައިފި

ބައިނަލްއަޤްވާމި އަންހެނުންގެ ދުވަސް، ފޮޓޯ: އިންޓަނެޓް
ބައިނަލްއަޤްވާމި އަންހެނުންގެ ދުވަހުގެ ތަޙުނިޔާ ދިވެހި އެންމެހާ އުޚްތުންނަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފޮނުއްވައިފިއެވެ.
މި ދުވަހުގެ ތަޙުނިޔާ އަރިސްކުރެއްވުމުގެ ގޮތުން ސޯޝަލް މިޑިއާގައި އެ މަނިކުފާނު ކުރެއްވެވި ޕޯސްޓެއްގައި ވިދާޅުވީ، މި ޤައުމުގެ ކޮންމެ ކުރިއެރުމެއްގެ ފަހަތުގައި އަންހެނުންގެ ބައިވެރިވުމާއި އެއްބާރުލެއްވުން ހިމެނޭ ކަމަށެވެ.
ދިވެހިރާއްޖެ ކޮންމެ ކުރިއެރުމަކާއި ކާމިޔާބީއެއް ޙާޞިލްކުރަނީ ހީވާގި ދިވެހި އަންހެނުންގެ ބައިވެރިވުމާއި އެއްބާރުލުމާއި އެކު.
ސޯޝަލް މިޑިއާގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ކުރެއްވެވި ޕޯސްޓުގައި ވެއެވެ.
ބައިނަލްއަޤްވާމީ އަންހެނުންގެ ދުވަހުގެ މުނާސަބަތުގައި އެ މަނިކުފާނު ފޮނުއްވި ޚިޠާބުގައި ވެސް، މުޖުތަމަޢުގެ ކުރިއެރުމުގައި އަންހެނުންގެ ދައުރު އޮތް މިންވަރު ވަނީ ޙިއްސާކުރައްވާފައެވެ. އެގޮތުން އެ މަނިކުފާނު ވިދާޅުވީ، ތަޢުލީމާއި، ޞިއްޙަތާއި، އިޖުތިމާޢީ މި ނޫން ޚިދުމަތްތަކާއި، ވެރިކަން ހިންގުމާއި، ވިޔަފާރިއާއި އިޤްތިޞާދީ މަސައްކަތްތަކާއި އަދި މި ނޫނަސް މުޖުތަމަޢެއްގެ ދިރުމާއި ކުރިއެރުމާ ގުޅިފައިވާ ކޮންމެ ކަމެއްވެސް ހިނގަމުންދާނީ، އަދި ކާމިޔާބުވެ ކުރިއަރާނީ އަންހެނުންގެ ފުރިހަމަ ބައިވެރިވުމާއެކީގައި ކަމަށެވެ.
އެހެންކަމުން، ދިވެހި ސަރުކާރުގެ އެންމެ އިސް އެއް ސިޔާސަތަކީ، މުޖުމަތަޢުގައި އަންހެން ދަރީންނަށް އޮތް ފުރުޞަތުތައް އިތުރަށް ފަހިކޮށްދީ، ސަރުކާރު ހިންގުމުގައި އަންހެނުންގެ ޙިއްޞާ އިތުރުކޮށް، އަންހެނުންނަކީ ފުދުންތެރި ބާރުވެރި ބަޔަކަށް ހެދުން ކަމަށް ވެސް އެ މަނިކުފާނު ވަނީ ވިދާޅުވެފައެވެ.
އަދި މުޖްތަމަޢުގެ ދެމިއޮތުމާއި ކުރިމަގަށް މުހިންމު ދާއިރާތައް ކަމުގައިވާ ސިއްޙީ ދާއިރާ އާއި ތަޢުލީމީ ދާއިރާގައި ގިނައީ އަންހެން ޚިދުމަތްތެރީންކަން އެ މަނިކުފާނު ވިދާޅުވިއެވެ. އަދި ކުޅިވަރުގެ މައިދާނުގައި ދިވެހި އަންހެން ކުޅުންތެރީން ހާސިލުކުރާ އަރުތަ ގިނަގުނަކަމަށާއި، ޘާނަވީއާއި މަތީ ޘާނަވީ އަދި ޔުނިވަރސިޓީ ތަޢުލީމުގެ މަރުޙަލާގައި ވެސް ދިވެހި އަންހެން ކުދީން ގިނައިން އުނގެނޭއިރު، މަތީ ނަތީޖާ ހޯދުން ގިނައީވެސް އަންހެން ދަރީންކަމަށް އެ މަނިކުފާނު ފާހަގަކުރެއްވެވިއެވެ.