ޚަބަރު
ކޮމަންވެލްތުގެ އެއްބައިވަންތަކަމަކީ ގޮންޖެހުންތަކުން އަރައިގަތުމަށް ބޭނުންވާ ހަކަތަ: ރައީސުލްޖުމްހޫރިއްޔާ

ކޮމަންވެލްތުގެ އިދާރާގައި ނަގާފައިވާ އެ ޖަމްއިއްޔަގެ މެންބަރު ޤައުމުތަކުގެ ދިދަތައް، ފޮޓޯ: ކޮމަންވެލްތު
ކޮމަންވެލްތުގެ ޤައުމުތަކުގެ އެއްބައިވަންތަކަމަކީ ދޭދޭ މެންބަރުން ހިއްސާކުރާ ގޮންޖެހުންތަކުން އަރައިގަތުމަށް ބޭނުންވާ އެއްބާރުލުން ހޯދައިދޭ ހަކަތަކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
އެ މަނިކުފާނު މިހެން ވިދާޅުވީ، މިއަދު ފާހަގަކުރާ ކޮމަންވެލްތު ދުވަހުގެ މުނާސަބަތުގައި ފޮނުއްވި ޙާއްސަ މެސެޖެއްގައެވެ. އަދި މި ދަނޑަވަޅަކީ ކޮމަންވެލްތު އާއިލާގެ އެއްބައިވަންތަކަމުގައި ހުރި ބާރު ހަނދާންކޮށްދޭ ދަނޑިވަޅެއް ކަމުގައި ރައީސުލްޖުމްހޫރިއްޔާ ވިދާޅުވިއެވެ.
މީގެ އިތުރުން، މި އަހަރުގެ ކޮމަންވެލްތު ދުވަހުގެ ޝިޢާރު ކަމުގައިވާ، "ޓުގެދަރ ވީ ތްރައިވް" އިން ދިވެހި ދައުލަތުން އެއްބައިވަންތަކަމާއި، ވިލުންތެރިކަމާއި ކުރިއެރުމަށް ދޭ އަހަންމިއްޔަތު ރަމްޒުކޮށްދޭކަމަށް ވެސް ރައީސުލްޖުމްހޫރިއްޔާ ވިދާޅުވިއެވެ. އަދި ދުނިޔޭގެ އެކި ހިސާބުހިސާބުން ގެއްލިފައިވާ ހަމަޖެހުން އަނބުރާ ހޯދުމަށް މުޅި ކޮމަންވެލްތުން ބައިވެރިވެގެން ހިންގާ ހަރަކާތުގެ ބުރަދަން ދެނެ ތިބެ، އެއްބައެއްގެ ގޮތުގައި ދެމި ތިބުމަށް އެ މަނިކުފާނު ވަނީ ގޮވާލައްވާފައެވެ.
ހަމައެއާއެކު، ރާއްޖެ ފަދަ ކުދި ޖަޒީރާ ރަށްތަކުގެ ހައްޤުގައި ކޮމަންވެލްތުން ކުރައްވާ މަސައްކަތް ރައީސުލްޖުމްހޫރިއްޔާ ފާހަގަކުރެއްވެވިއެވެ. އެގޮތުން މޫސުމީ ވިލުންތެރިކަމާއި، މާލީ ވަޞީލަތްތަކަށް ފުރުޞަތު ފަހިކުރުމާއި، އަންހެނުންނާއި ޒުވާނުން ބާރުވެރިކުރުވުން ފަދަ ކަންކަމުގައި ކޮމަންވެލްތުން ކުރައްވާ މަސައްކަތުގެ އަގުވަޒަންކުރައްވާކަމަށް އެމަނިކުފާނުގެ މެސެޖުގައި ވިދާޅުވެފައިވެއެވެ.
އަދި ކޮމަންވެލްތު ޗާޓަރުން ލާޒިމުކުރާ ޑިމޮކްރަސީގެ އަސާސްތައް ކަމުގައިވާ އިންސާނީ ޙައްޤުތަކާއި، ހެޔޮ ވެރިކަމާއި، ދެމެހެއްޓެނިވި ތަރައްޤީގެ މަގުގައި ސާބިތުވެ ހުންނަވާނޭ ކަމުގެ ޔަޤީންކަން އެމަނިކުފާނުގެ މެސެޖުގައި ދެއްވާފައިވެއެވެ.
ރައީސުލްޖުމްހޫރިއްޔާގެ މެސެޖު ނިންމަވާލައްވަމުން ވިދާޅުވީ، ކޮމަންވެލްތުގެ ކޮންމެ ފަރުދެއްގެ ކުރިއެރުމަށް، ކޮމަންވެލްތާއި މެންބަރު ޤައުމުތަކާއެކު އޮތް ގުޅުން ހަރުދަނާކުރުމަށް ދިވެހިރާއްޖެއިން ތައްޔާރަށް އޮތްކަމަށެވެ.
ދިވެހިރާއްޖެ އެންމެ ފުރަތަމަ ކޮމަންވެލްތުގެ މެންބަރު ޤައުމަކަށްވީ 1982 ގައެވެ. ނަމަވެސް، ކޮމަންވެލްތުން ރާއްޖެއާ މެދު ތަފާތުކުރުން ގެންގުޅޭ ކަމަށާއި ދާހިލީ ކަންކަމުގެ ތެރެއަށް އެ ޖަމާއަތުން ވަންނަ ކަމަށް ބުނެ، ކުރީގެ ރައީސް އަބްދުﷲ ޔާމީންގެ ވެރިކަމުގައި 2016 ވަނަ އަހަރުގެ އޮކްޓޯބަރު މަހު ކޮމަންވެލްތުގެ މެމްބަރުކަމުން ރާއްޖެ ވަނީ ވަކިވެފައެވެ.
އެހެންނަމަވެސް، ރައީސް އިބްރާޙިމް މުޙައްމަދު ޞާލިޙްގެ ވެރިކަމުގައި ރާއްޖެ ވަނީ އަނެއްކާވެސް ކޮމަންވެލްތާ ގުޅިފައެވެ. ދެވަނަ ފަހަރަށް ރާއްޖެ ކޮމަންވެލްތާ ގުޅުނީ އެ ޖަމްޢިއްޔާގެ 54 ވަނަ މެމްބަރު ގައުމެގެ ގޮތުގައި، 1 ފެބުރުއަރީ 2020 ގައެވެ.