ފާއިތުވި 24 ގަޑިއިރު އެންމެ ބޯކޮށް ވާރޭ ވެހުނީ މާލެއަށް!

ފާއިތުވި 24 ގަޑިއިރު އެންމެ ބޯކޮށް ވާރޭ ވެހުނީ މާލެއަށްކަމަށް މޫސުމާ ބެހޭ ޤައުމީ އިދާރާ، މެޓް އޮފީހުން ހާމަކޮށްފިއެވެ.

މޫސުމާ ބެހޭ ޤައުމީ އިދާރާއިން ވަނީ ފާއިތުވި 24 ގަޑިއިރު އެންމެ ބޯކޮށް ވާރޭ ވެހުނު ރަށްތައް ޢާންމުކޮށްފައެވެ. އެގޮތުން، ފާއިތުވި 24 ގަޑިއިރު މާލެއަށް ވަނީ 145.4 މިލިލީޓަރުގެ ވާރޭ ވެހިފައި ކަމަށް މެޓް އޮފީހުން ވިދާޅުވެއެވެ. އަދި ދެވަނައަށް އެންމެ ގިނައިން ވާރޭ ވެހިފައިވަނީ ހދ. ހަނިމާދޫއަށެވެ. އެގޮތުން، ވޭތުވެދިޔަ 24 ގަޑިއިރުގެ ތެރޭގައި ހަނިމާދޫއަށް ވަނީ 72.6 މިލިލީޓަރުގެ ވާރޭ ވެހިފައެވެ.

ވޭތުވެދިޔަ 24 ގަޑިއިރު ރާއްޖެއަށް އެންމެ ބޯކޮށް ވާރޭ ވެހުނު ސަރަޙައްދުތައް:

• ކ. މާލެ - 145.4 މިލލީޓާރުގެ ވާރޭ
• ހދ. ހަނިމާދޫ - 72.6 މިލިލީޓާރުގެ ވާރޭ
• ނ. މާފަރު - 65.7 މިލިލީޓާރުގެ ވާރޭ
• ކ. ހުޅުލެ - 62.9 މިލިލީޓާރުގެ ވާރޭ
• މ. މުލި - 58.8 މިލިލީޓާރުގެ ވާރޭ

މޫސުމާ ބެހޭ ޤައުމީ އިދާރާއިން ވިދާޅުވީ، މިއަދު އިރުއޮއްސި 18:00 އާއި ހަމައަށް އުތުރާއި މެދުރާއްޖެތެރޭގެ އެކި ހިސާބުތަކަށް ވިއްސާރަ ކުރުމާއެކު ގުގުރާނެކަމަށް ލަފާކުރެވޭ ކަމަށެވެ. އަދި ބައެއް ރަށްތަކަށް ބޯކޮށް ވާރޭ ވެހުން އެކަށީގެންވާ ކަމަށް އެ އިދާރާއިން މަޢުލޫމާތުދެއެވެ. މީގެ އިތުރުން، ދެކުނުގެ ބައެއް ރަށްތަކަށް ކެރީގެ އަސަަރުފޯރާނެކަމަށް އެ އިދާރާއިން ވަނީ ލަފާކޮށްފައެވެ. ނަމަވެސް، މޫސުން އާންމު ގޮތެއްގައި ރަނގަޅުވާނެކަމަށް މެޓް އޮފީހުން ވަނީ ވިދާޅުވެފައެވެ.

މެޓް އޮފީހުން ވިދާޅުވީ، ދެކުނުގެ އަތޮޅުތަކަށް ހުޅަނގު އުތުރާއި އުތުރުން ގަޑިއަކު ތިން މޭލާއި 10 މޭލު ދެމެދުގެ ބާރުމިނުގައި ވައިޖެހޭނެކަމަށް ލަފާ ކުރެވޭ ކަމަށެވެ. އަދި އެެހެން ހިސާބުތަކަށް އިރުއުތުރާއި އިރުން ގަޑިއަކު އަށް މޭލާ 18 މޭލު ދެމެދުގެ ބާރުމިނުގައި ވައި ޖެހޭނެ ކަމަށް ލަފާ ކުރެވޭ އިރު، ވިލާގަނޑުގައި ގަޑިއަކު 35 މޭލަށް ވައި ގަދަވުން އެކަށީގެންވާ ކަމަށް ވެސް އެ އިދާރާއިން ވިދާޅުވެއެވެ.

މޫސުން ގޯސްވުމުގެ ސަބަބުން މެދުރާއްޖެ ތެރެއަށް ރީނދޫ ސަމާލު ނެރިފާވާއިރު، މޫސުމަށް ސަމާލުވުމަށް އެ އިދާރާއިން ވަނީ އިލްތިމާސްކުރައްވާފައެވެ.