ޚަބަރު
ފިލިޕީންސް، ސްޕެއިން އަދި ނިއުޒިލޭންޑް އަށް ކަނޑައެޅި ނޮން ރެޒިޑެންސް ސަފީރުންނަށް މަޖިލީހުން ރުހުންދީފި
ރައްޔިތުންގެ މަޖިލީހުގެ ޖަލްސާއެއް ކުރިއަށްދަނީ. ފޮޓޯ: މަޖިލިސް
ފިލިޕީންސް، ސްޕެއިން އަދި ނިއުޒިލޭންޑް އަށް ކަނޑައެޅި ނޮން ރެޒިޑެންސް ސަފީރުންނަށް ރައްޔިތުންގެ މަޖިލީހުން ރުހުންދީފިއެވެ.
ރައީސުލްޖުމްހޫރިއްޔާ ޑރ މުޙައްމަދު މުޢިއްޒު، ފިލިޕީންސްއަށް ކަނޑައަޅުއްވާ ނޮން-ރެޒިޑެންޓް ސަފީރުގެ މަޤާމަށް އައްޔަނުކުރެއްވުމަށް ފޮނުއްވެވީ މެލޭޝިއާއަށް ރާއްޖޭން ކަނޑައަޅުއްވާފައި ހުންނަވާ ސަފީރު ޑރ މަރިޔަމް ޝަބީނާ އަހުމަދު ޢައްޔަންގެ ނަންފުޅެވެ.
މީގެއިތުރުން ސްޕެއިނަށް ކަނޑައަޅުއްވާ ނޮން-ރެޒިޑެންޓް ސަފީރުގެ މަޤާމަށް ޢައްޔަން ކުރައްވަން ފޮނުއްވާފައިވަނީ އިނގިރޭސިވިލާތަށް ރާއްޖޭން ކަނޑައަޅުއްވާފައި ހުންނަވާ ސަފީރު ޑރ އިރުތިޝާމް އާދަމްގެ ނަންފުޅެވެ.
އަދި ނިއުޒިލޭންޑަށް ކަނޑައަޅުއްވާ ނޮން-ރެޒިޑެންޓް ސަފީރުގެ މަޤާމަށް ޢައްޔަން ކުރެއްވުމަށް ރައީސް ޑރ މުޢިއްޒު ފޮނުއްވާފައިވަނީ ސިންގަޕޫރަށް ރާއްޖޭން ކަނޑައަޅުއްވާފައި ހުންނަވާ ސަފީރު މުޙައްމަދު ލުވޭޒުގެ ނަންފުޅެވެ.
ރައްޔިތުންގެ މަޖިލީހުގެ ޚާރިޖީ ގުޅުންތަކުގެ ކޮމިޓީން އެ ބޭފުޅުންގެ ނަންތައް ދިރާސާކުރުމަށްފަހު ވަނީ ތިން ބޭފުޅުންވެސް ނޮން-ރެޒިޑެންޓް ސަފީރުންނަށް ޢައްޔަންކުރައްވަން ފެންނަކަމަށް ފާސްކޮށްފައެވެ. އަދި މަޖިލީހަށް އެ ރިޕޯޓް ހުށަހެޅުމުން މަޖިލީހުންވެސް ވަނީ އެ ބޭފުޅުންނަށް ރުހުން ދޭން ފެންނަ ކަމަށް ފާސްކޮށްފައެވެ.މިގޮތަށް ފާސްކޮށްފައިވަނީ 54 މެންބަރުންގެ ވޯޓުންނެވެ.
