އަޅުކަމާއި ގުޅުންތައް ބަދަހިކުރުމަށް ސަރުކާރު މުވައްޒަފުންނަށް ބޮޑު ޗުއްޓީއެއް

މި އަހަރުގެ ފިޠުރު ޢީދާ ގުޅިގެން  އެޕްރީލް މަހުގެ ފުރަތަމަ ބުރާސްފަތި ދުވަސް ބަންދުކުރުމަށް ނިންމުމާ ގުޅިގެން، ސަރުކާރުގެ މުވައްޒަފުންނަށް 15 ދުވަހުގެ ބޮޑު ޗުއްޓީއެއް ލިބޭނެއެވެ.

ރައީސުލްޖުމްހޫރިއްޔާގެ އޮފީހުން މިއަދު ނެރުނު ބަޔާނެއްގައި ބުނީ، މި އަހަރުގެ ފިޠުރު ޢީދު ދުވަހަކީ އާދީއްތަ ނޫނީ ހޯމަ ދުވަސް ކަމުގައި ވިޔަސް، އެޕްރީލް 3 ވާ ބުރާސްފަތި ދުވަހަކީ ސަރުކާރު ބަންދު ދުވަހެއްކަމަށް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ކަނޑުއަޅުއްވާފައިވާ ކަމަށެވެ.

އަދި މި ނިންމެވުމަކީ ފިޠުރު ޢީދުގެ ބަންދާ ގުޅިގެން، ޢާއިލާއާއެކު ވީހާވެސް ގިނަދުވަސްތަކެއް އެކުގައި ހޭދަކުރުމަށް ފުރުޞަތު ފަހިކޮށްދިނުމުގެ ގޮތުން، މެދުނުކެނޑޭގޮތަށް ބަންދު ދުވަސްތައް މުވައްޒަފުންނަށް ލިބޭގޮތަށް ހަމަޖައްސަވައި ދެއްވުމުގެ މަޤްޞަދުގައި ރައީސުލްޖުމްހޫރިއްޔާ ނިންމެވިނިންމެވުމެއްކަމަށް ވެސް އެ އޮފީހުން ހާމަކޮށްފައިވެއެވެ.

އެޕްރީލް މަހުގެ 3 ވަނަ ދުވަސް ބަންދުކުރުމާ ގުޅިގެން، ސަރުކާރު މުވައްޒަފުންނަށް ލިބޭ ބަންދު ދުވަސްތަކުގެ މުއްދަތު އިތުރުވަނީ، ރޯދަ މަހުގެ ފަހު 10 ދުވަހަކީ ވެސް ބަންދު ދުވަސްތަކެއްކަމަށް ރައީސުލްޖުމްހޫރިއްޔާ ކަނޑައަޅުއްވާފައިވުމުންނެވެ. 

ރޯދަމަހުގެ ފަހު 10 ގައި ސަރުކާރު ބަންދުކުރަން ރައީސް ނިންމެވީ، އިސްލާމީ އުސޫލުތައް ގާއިމު ކުރެއްވުމަށާއި ދީނީ ކަންކަމަށް ރައްޔިތުން ލޯބި ޖެއްސުމާއި ދީނީ ކަންކަމަށް އިސްކަން ދިނުމަށް ފުރުސަތު ދިނުމަށް ކަމަށް ރައީސް އޮފީހުން ވަނީ ހާމަކޮށްފައެވެ. 

އެހެންކަމުން މި މަހު 20 ވަނަ ދުވަހުން ފެށިގެން ދެ ހަފްތާއަށް ވުރެ ދިގު މުއްދަތަކަށް ސަރުކާރު ބަންދުވާނެއެވެ.