ކެނެޑާގެ އައު ބޮޑުވަޒީރަށް ރައީސުލްޖުމްހޫރިއްޔާ ތަހުނިޔާ ފޮނުއްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ކެނެޑާގެ އައު ބޮޑުވަޒީރު، ހިޒް އެކްސަލަންސީ މާކް ޖޯސެފް ކަރނީ އަށް ތަހުނިޔާ ފޮނުއްވައިފިއެވެ.

ރައީސުލްޖުމްހޫރިއްޔާ އެމަނިކުފާނަށް ތަހުނިޔާ ވިދާޅުވެފައިވަނީ، ފޮނުއްވެވި މެސެޖެއްގައެވެ. މި މެސެޖުގައި ރައީސް ވަނީ، ދިވެހި ސަރުކާރާއި ރައްޔިތުންގެ ނަމުގައި، ކެނެޑާގެ އައު ބޮޑުވަޒީރު، ހިޒް އެކްސަލަންސީ މާކް ޖޯސެފް ކަރނީއަށް ތަހުނިޔާ ވިދާޅުވެފައެވެ.

މީގެ އިތުރުން ރައީސުލްޖުމްހޫރިއްޔާ ވިދާޅުވީ، ކެނެޑާގެ އައު ބޮޑުވަޒީރުގެ ޒަޢާމަތުގައި އެ ޤައުމުގެ ހަމަޖެހުމާއި ފާގަތިކަން ދެމި އޮންނާނެކަމުގެ ޔަޤީންކަން އޮންނަވާ ކަމަށެވެ. ހަމަ އެހެންމެ. އެ ޤައުމުގެ އައު ބޮޑު ވަޒީރަށް ކާމިޔާބީއާއި، ދުޅަހެޔޮ ޞިއްޙަތަކަށް ރައީސް ވަނީ އެދިވަޑައިގެންފައެވެ. އަދި ކެނެޑާގެ ރައްޔިތުންނަށް އަމަންއަމާންކަމާއި ކުރިއެރުމަށްވެސް ރައީސުލްޖުމްހޫރިއްޔާ އެދިވަޑައިގެންފައިވެއެވެ.