އދ.ގައި ރައީސް މުޢިއްޒު ދެއްވި ތަޤުރީރަކީ ދިވެހިރާއްޖޭގެ ޤަދަރު އުފުލިގެންދިޔަ ތަޤުރީރެއް: ޕީއެންސީ

އދ.ގައި ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ދެއްވެވި ތަޤުރީރަކީ ދިވެހިރާއްޖޭގެ ޤަދަރު އުފުލިގެންދިޔަ ތަޤްރީރެއް ކަމަށް ވެރިކަންކުރާ ޕީއެންސީއިން ބުނެފިއެވެ. 

ޕީއެންސީ އިން މިކަމާ ގުޅިގެން ނެރެފައިވާ ބަޔާނެއްގައި ބުނެފައިވަނީ އދ.ގެ ސަލާމަތީ މަޖިލީހުގައި ރައީސް ޑރ މުޢިއްޒު އިއްވެވި ތަޤްރީރުގައި ފާހަގަކުރައްވައިފައިވާ ކަންކަމަކީ ދުނިޔެއަށް އަންނަމުންދާ ބޮޑެތި ބަދަލުތަކަށް ރިޢާޔަތްކުރައްވައި، ގިނަ ދައުލަތްތައް ބައިވެރިވާ ބައިނަލްއަޤްވާމީ ނިޒާމަށް މިހާރުން މިހާރަށް ގެންނަންޖެހިފައިވާ ބޮޑެތި ބަދަލުތަަކަށް އަލިއަޅުއްވައިލައްވައި، ދުނިޔޭގެ ޞުލްޙަޔާއި އަމާންކަން ކަށަވަރުކޮށް ބައިނަލްއަޤްވާމީ ނިޒާމަކީ ހަމަހަމަކަމާއި ޢަދުލުވެރިކަން ޤާއިމްވެފައިވާ ނިޒާމެއްކަން ކަށަވަރުކުރަން އަޅަންޖެހޭ އިޞްލާޙީ ފިޔަވަޅުތައް ފާހަގަކުރައްފައިވާ ވަރަށްވެސް ފުރިހަަމަ އެހާމެ ތާރީޚީ ތަޤުރީރެއް ކަމަށެވެ. 

މީގެއިތުރުން މިތަޤްރީރަކީ އދ.ގެ ތާރީޚުގައި ރާއްޖެ ހޭދަކުރި ދިގު ތާރީޚުގައި މިޤައުމުގެ ރައީސަކު އިއްވެވި އެންމެ ފުރިހަމަ ތަޤުރީރުކަން ޕީއެންސީއިން ފާހަގަކުރިއެވެ. 

މުޅި ދުނިޔެއަށް ފެންނާނެހެން އިޒްރާއީލުން ފަލަސްތީނާއި ލުބްނާނުގެ ރައްޔިތުންނާމެދު ހިންގަމުންދާ އަނިޔާވެރި ޓެރަރިޒަމްގެ ޢަމަލުތައް ހުއްޓުވުމަށް ދުނިޔެ ރޮއެ އާދޭސްކުރާއިރު، އެ ޢަމަލުތައް ހުއްޓުވުމުގައި އދ ފެއިލް ވެފައިވާ ސަބަބަކީ މަދު ދައުލަތްތަކަށް ލިބިފައިވާ ވީޓޯ ކުރުމުގެ ބާރުގެ ސަބަބުންކަން ރައީސް ޑރ.މުޢިއްޒު ފާހަގަކުރެއްވި ކަމަށް  ޕީއެންސީއިން ބުނެފައިވެއެވެ.

މީގެ އިތުރުންވެސް އދ ގެ ސަލާމަތީ މަޖިލީހުގައި ރައީސް ޑރ.މުޢިއްޒު ދެއްކެވި ވާހަކަފުޅުތަކަށް އަލި އަޅުވައިލައްވަމުން ޕީއެންސީން ވަނީ އެމަނިކުފާނަށް މަރުޙަބާ ދަންނަވައި، ދުނިޔޭގެ އެންމެ ބާރުގަދަ މަޖިލީހުގައި ރާއްޖޭގެ އަޑު އިއްވެވުމަށް ނިންމެވީތީ އެކަމަށް ޝުކުރު އަދާކޮށްފައެވެ.