ވީޑިއޯ މެދުވެރިކޮށް "ރައީސްގެ ޖަވާބު" ސިލްސިލާއަށް ސުވާލު ހުށައެޅުއްވުމަށް ޕޯޓަލްއެއް ހުޅުވައިފި

ވީޑިއޯ މެދުވެރިކޮށް "ރައީސްގެ ޖަވާބު" ސިލްސިލާއަށް ސުވާލު ހުށައެޅުއްވުމަށް ޕޯޓަލްއެއް ހުޅުވައިލައިފިއެވެ. 

ރައީސް އޮފީހުން ވިދާޅުވީ، ރައްޔިތުން ވީޑިއޯ މެދުވެރިކޮށް ހުށަހަޅުއްވާ ސުވާލުތަކަށް، ސީދާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޖަވާބު ދެއްވުމަށް ކުރިއަށް ގެންދެވި "ރައީސްގެ ޖަވާބު" ސިލްސިލާގައި، ވީޑިއޯ މެދުވެރިކޮށް ސުވާލު ހުށަހަޅުއްވަން ބޭނުންވާ ރައްޔިތުންނަށް ރައީސުލްޖުމްހޫރިއްޔާގެ އޮފީހުން އެ ފުރުޞަތު ޢާއްމުކޮށް ހުޅުވައިލައްވައިފައިވާ ކަމަށެވެ.

ރައީސުލްޖުމްހޫރިއްޔާގެ އޮފީހުން ވިދާޅުވީ، ވީޑިއޯ މެދުވެރިކޮށް ރައީސްއާއި ސުވާލުކުރައްވަން ބޭނުންފުޅުވާ ރައްޔިތުން ސުވާލު ރެކޯޑްކުރެއްވުމަށްފަހު ރައީސުލްޖުމްހޫރިއްޔާގެ އޮފީހުގެ "ރައްޔިތުންގެ އަޑު" ޕޯޓަލް މެދުވެރިކޮށް ހުށައެޅުއްވޭނެ ކަމަށެވެ. އަދި މި ޕޯޓަލްއަށް https://citizensvoice.gov.mv މި ލިންކެ މެދުުވެރިކޮށް ނުވަތަ ރައީސުލްޖުމްހޫރިއްޔާގެ އޮފީހުގެ ރަސްމީ ވެބްސައިޓު މެދުވެރިކޮށްވެސް ކޮންމެ ރައްޔިތަކަށްވެސް ބޭނުންކުރެވޭނެ ކަމަށް ރައީސް އޮފީހުން ވަނީ މަޢުލޫމާތުދެއްވާފައެވެ. މީގެ އިތުރުން، މި ޕޯޓަލް މެދުވެރިކޮށް ރައްޔިތުން ހުށަހަޅުއްވަމުން ގެންދަވާ ސުވާލުތަކަށް ރައީސް ޖަވާބު ދެއްވާނީ، "ރައީސްގެ ޖަވާބު" ސިލްސިލާގެ ތެެރެއިން ކަމަށް އެ އޮފީހުން ވަނީ ވިދާޅުވެފައެވެ.

"ރައީސްގެ ޖަވާބު" ސިލްސިލާއަކީ، ވީޑިއޯ މެދުވެރިކޮށް ރައްޔިތުން ހުށަހަޅުއްވާ ސުވާލުތަކަށް، ސީދާ ރައީސުލްޖުމްހޫރިއްޔާ ވީޑިއޯ މެދުވެރިކޮށް ދެއްވާ ޖަވާބު ޢާންމު ކުރައްވަމުން ގެންދަވާގޮތަށް މިދިޔަ އަހަރުގެ ފެބްރުއަރީ މަހު ފެށްޓެވި ސިލްސިލާއެކެވެ. މި ސިލްސިލާ އޭރު ކުރިއަށް ގެންގޮސްފައިވަނީ ރައީސުލްޖުމްހޫރިއްޔާގެ އޮފީހުގެ މީޑިއާ ޓީމަކުން ރައްޔިތުންނާ ބައްދަލުކޮށް، ވީޑިއޯ ސުވާލު ހުށަހެޅުމަށް ފުރުޞަތު ދީގެންނެވެ. ނަމަވެސް، މިގޮތަށް މިކަން ކުރިއަށް ގެންދިއުމުން، ރާއްޖޭގެ އެކި ކަންކޮޅުތަކުގައި އެކި ކަންކަމާއި ގުޅިގެން ރައީސުލްޖުމްހޫރިއްޔާއާއި ސުވާލުކުރެއްވުމަށް ބޭނުންފުޅުވާ ހުރިހާ ރައްޔިތުންނަށް ހަމަހަމަގޮތެއްގައި ފުރުޞަތު ދެވެމުން ނުދާކަން ރައީސް އޮފީހުން ވަނީ ފާހަގަކުރައްވާފައެވެ.

އެހެންކަމުން، ކޮންމެ ރައްޔިތަކަށްވެސް ވީޑިއޯ ސުވާލު ހުށަހެޅޭނެ ޕޯޓަލްއެއް އުފައްދައި ބޭނުންކުރެވެން ފެށެންދެން "ރައީސްގެ ޖަވާބު" ސިލްސިލާ ވަނީ ވަގުތީގޮތުން މެދުކަނޑައިލައްވައިފައެވެ. "ރައީސްގެ ޖަވާބު" ސިލްސިލާ އަލުން ފައްޓަވާފައި މި ވަނީ، ވީޑިއޯ މެދުވެރިކޮށް ކޮންމެ ރައްޔިތަކު ކޮންމެ ވަގުތަކު ރައީސުލްޖުމްހޫރިއްޔާއަށް ހުށަހަޅުއްވަން ބޭނުންފުޅުވާ ކޮންމެ ސުވާލެއްވެސް، "ރައްޔިތުންގެ އަޑު" ޕޯޓަލް މެދުވެރިކޮށް ވަގުތުން ހުށަހެޅުއްވޭނެ އިންތިޒާމުތަކާއި އެކުގައި ކަމަށް ރައީސް އޮފީހުން ވިދާޅުވެއެވެ.