Ads by Exprox

ޚަބަރު

ސާންތީގެ ވަކިވެ ދިއުމަކީ ދިވެހި ކުޅިވަރަށް ލިބުނު ބޮޑު ހިތާމައަކާއި ހުސްކަމެއް: ރައީސް

ސާންތީގެ ވަކިވެ ދިއުމަކީ ދިވެހި ކުޅިވަރަށް ލިބުނު ބޮޑު ހިތާމައަކާއި ހުސްކަމެއް: ރައީސް

އިޙްސާން އަބްދުލް ޣަނީ (ސާންތީ) ---

މިފްތާޙް މުޙައްމަދު

މިފްތާޙް މުޙައްމަދު

23 މާރިޗު 2025، 04:41

23 މާރިޗު 2025، 04:41

ދިވެހި ފުޓްބޯޅައަށް ގިނަ ޚިދުމަތްތަކެއް ކުރެއްވި އިޙްސާން އަބްދުލް ޣަނީ (ސާންތީ)ގެ ވަކިވެ ދިއުމަކީ ދިވެހި ކުޅިވަރަށް ލިބުނު ބޮޑު ހިތާމައަކާއި ހުސްކަމެއް ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ، ކެންސަރު ބައްޔަށް ފަރުވާ ހޯއްދަވަމުން ދަނިކޮށް ރޭގެ ވަގުތެއްގައި ސާންތީ ނިޔާވުމާ ގުޅިގެން ސޯޝަލް މީޑިއާގައި ކުރެއްވެވި ޕޯސްޓެއްގައެވެ.

އެގޮތުން، ސާންތީ ވަނީ ކުޅިވަރުގެ ރޮނގުން، ވަކީން ޚާއްޞަކޮށް ފުޓްބޯޅައިގައި ބައިނަލްއަޤްވާމީ އަދި ޤައުމީ ފެންވަރުގައިވެސް ދިވެހިރާއްޖެ ފަޚުރުވެރިވާ ޚިދުމަތްތަކެއް ޤައުމަށް ކޮށްދެއްވާފައިވާކަމަށް ރައީސުލްޖުމްހޫރިއްޔާ ވިދާޅުވިއެވެ.

ކުޅިވަރުގެ ރޮނގުން، ވަކީން ޚާއްޞަކޮށް ފުޓްބޯޅައިގައި ބައިނަލްއަޤްވާމީ އަދި ޤައުމީ ފެންވަރުގައިވެސް ދިވެހިރާއްޖެ ފަޚުރުވެރިވާ ޚިދުމަތްތަކެއް ޤައުމަށް ކޮށްދެއްވާފައިވާ މަޝްހޫރު ފުޓްބޯޅަ ކޯޗު އިޙްސާން ޢަބްދުލްޣަނީ (ސާންތީ) އަވަހާރަވުމަކީ، ދިވެހި ކުޅިވަރުގެ ދާއިރާއަށް ލިބުނު ބޮޑު ހިތާމައެއް އަދި ހުސްކަމެއް.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވިއެވެ.

ސާންތީ ނިޔާވުމާ ގުޅިގެން ރައީސުލްޖުމްހޫރިއްޔާ ވަނީ ކުޅިވަރުގެ ދާއިރާގެ ހުރިހާ ޚިދުމަތްތެރީންނަށް އަދި ސާންތީގެ ލޮބުވެތި ޢާއިލާއަށް ތަޢުޒިޔާ ދަންނަވާފައެވެ.

ދިވެހިރާއްޖެއިން ފުރަތަމަ ފަހަރަށް ސާފް ޗެމްޕިއަންޝިޕް ކާމިޔާބުކުރިއިރު، ޓީމުގެ އެސިސްޓެންޓު ކޯޗެއްގެ ގޮތުގައި ވެސް ހުންނެވީ ސާންތީއެވެ. 

ސާންތީ ފުރަތަމަ ފެނުނީ ފުޓުބޯޅަ ކުޅުންތެރިއެއްގެ ގޮތުގައެވެ. އަދި އޭގެ ފަހުން ކޯޗިން ދާއިރާގައި އޭނާ ވަނީ ދިވެހި ފުޓްބޯޅައަށް ގިނަ ޚިދުމަތްތަކެއް ކުރައްވާފައެވެ. ހާއްސަކޮށް އެފްއޭއެމުގެ ޔޫތު ޑިވެލޮޕްމަންޓް ޕްރޮގްރާމް ފައްޓައި އެ ޕްރޮގްރާމް ކުރިއަށް ގެންދިއުމުގައި އޭނާގެ މަސައްކަތް ފާހަގަކުރެވެއެވެ.

ޤައުމީ ޓީމުގެ އެސިސްޓެންޓު ކޯޗެއްގެ ގޮތުގައި ސާންތީ ވަނީ 2001 އިން ފެށިގެން 2008 ވަނަ އަހަރާ ހަމައަށް މަސައްކަތްކުރައްވާފައެވެ. އެގޮތުން 2008ގައި ދިވެހި ޓީމުން ސާފް ޗެމްޕިއަންޝިޕް ކާމިޔާބުކުރިއިރު، އޭނާއަކީ ޓީމަށް މުހިންމު މަސައްކަތްކޮށްދެއްވި ބޭފުޅެކެވެ.

ކްލަބް ލެވެލްގައި ސާންތީ ވަނީ ކްލަބް އީގަލްސް އާއި ޔުނައިޓެޑް ވިކްޓަރީގައި މަސައްކަތް ކުރައްވާފައެވެ. އެގޮތުން ކްލަބް އީގަލްސްއާ އެކު އޭނާ ޤައުމީ ފުޓުބޯޅަ މުބާރާތް ވެސް ކާމިޔާބުކުރިއެވެ.

ފުޓްބޯޅަ އެސޯސިއޭޝަން އޮފް މޯލްޑިވްސްގެ ޓެކްނިކަލް ޑައިރެކްޓަރުކަންވެސް އަދާކުރި ސާންތީ ވަނީ ކުޅިވަރަށް ޚިދުމަތް ކުރުމުގެ ދާއިރާއިން ޒުވާނުންގެ ޤައުމީ އިނާމް ހާޞިލުކުރައްވާފައެވެ.

މި ލިޔުން ކިޔާލުމުން

Ads by MSS