ތެލެސީމިޔާ ބަލީގެ މީހުންނާއި އެ ބަލީގެ ކުދީންގެ ކަންބޮޑުވުންތަކާއިއެކު ޙާލަތު ބެއްލެވުމަށް ރައީސް ވަޑައިގެންފި

ތެލެސީމިޔާ ބަލީގެ މީހުންނާއި އެބަލީގެ ކުދިންގެ ބެލެނިވެރިންގެ ކަންބޮޑުވުންތަަކާއިއެކު ރޭ ކުރި މުޒާހަރާއަށްފަހު، ތެލެސީމިޔާ ސެންޓަރުގެ ޙާލަތު ބެއްލެވުމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ތެލެސީމިޔާ ސެންޓަރަށް މިއަދު ހެނދުނު ވަޑައިގެންފިއެވެ. 

ރައީސް މުޢިއްޒު އެސެންޓަރަށް ޒިޔާރަތްކުރައްވާ އެތަނުގެ ޙާލަތު ބައްލަވައި އެތަނުގައި ހުރި ދަތިކަންކަމާއި ގޮންޖެހުންތައް އޮޅުންފިލުއްވައިފައިވެއެވެ. 

ރައީސް ޑރ މުޢިއްޒުގެ މިޒިޔާރަތުގައި އެމަނިކުފާނުގެ އަރިހުގައި ޞިއްޙީ ވަޒީރު ޢަބްދުﷲ ނާޒިމް އަދި މާލީ ވަޒީރު މޫސާ ޒަމީރުވެސް ބައިވެރިވެވަޑައިގެންފައިވެއެވެ. 

ރައީސް މުޢިއްޒު ތެލެސީމިޔާ ސެންޓަރަށް ކުރެއްވެވި ޒިޔާރަތުގައި އެތަނުގައި އެވަގުތު ތިބި ބަލިމީހުންނާއި ބައްދަލިކުރައްވައި ވާހަކަފުޅުދައްކަވައިފައިވެއެވެ.

ތެލެސީމިޔާ ބަލީގެ މީހުންނާއި އެބަލީގެ ކުދިންގެ ބެލެނިވެރިން ރޭ މުޒާހަރާއެއް ކޮށްފައިވާއިރު ތެލެސީމިޔާ ސެންޓަރުގެ ހިންގުން ބޮއްސުންލައިގެން ގޮސްފައިވާމިންވަރާއި މެދު ކަންބޮޑުވުން ފާޅުކޮށް އެތަނުގެ އިސްވެރިންގެ އިސްތިއުފާއަށް ވެސް ގޮވައިފައިވެއެވެ.

އޭގެ ކުރިން ސޯޝަލްމީޑިއާގެ އެކި ޕްލެޓްފޯމްތަކުގައި ވެސް ކަންބޮޑުވުންތައް ވަނީ ހިއްސާކޮށްފައެވެ. އެކަންބޮޑުވުންތައް ހިއްސާކޮށް މުޒާހަރާކޮށްފައިވަނީ ތެލަސީމިއާ ސެންޓަރުގައި ބޭނުންކުރާ ފިލްޓަރުތައް ހަލާކުވެ، ލޭ ޕެކެޓުތަކުން އިސްރާފުވާ މިންވަރު އިތުރުވާތީ ކަމަށް ބުނެއެވެ. ރަށްރަށުގައި ވެސް އެ މައްސަލަ އަންނަނީ މެދުވެރިވަމުންނެވެ.

މީގެއިތުރުން މިދިޔަ އަހަރު ހަލާކުވެގެން ލޭޕެކެޓްތަކެއް އުކާލި ކަމަށާއި، 40 އަހަރުން މައްޗަށް ގޮސްފައިތިބި ތެލެސީމިޔާ ބަލީގެ މީހުންނަށްވެސް ފަރުވާދޭން ހުރީ ކުޑަކުދިންނަށް ޚާއްސަ ޑޮކްޓަރެއް ކަމަށްވެސް މުޒާހަރާގެ ބައިވެރިން ބުނެފައިވެއެވެ.