Ads by Exprox

ޚަބަރު

ތެލެސީމިއާ ކުދިންނާއި ބެލެނިވެރިންގެ ގިނަ ޝަކުވާތަކަކަށް މިހާރު ދަނީ ޙައްލު ލިބެމުން: ރައީސް

ތެލެސީމިއާ ކުދިންނާއި ބެލެނިވެރިންގެ ގިނަ ޝަކުވާތަކަކަށް މިހާރު ދަނީ ޙައްލު ލިބެމުން: ރައީސް

ރައީސުލްޖުމްހޫރިއްޔާ "ރައްޔިތުންނާ އެކު" ޕޮޑްކާސްޓްގައި ވާހަކަފުޅު ދައްކަވަނީ/ފޮޓޯ: ރައީސް އޮފީސް

27 މާރިޗު 2025، 01:59

ތެލެސީމިއާ ކުދިންނާއި އެކުދިންގެ ބެލެނިވެރިންގެ ގިނަ ޝަކުވާތަކަކަށް މިހާރު ދަނީ ޙައްލު ލިބެމުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިފަދައިން ވިދާޅުވީ، "ރައްޔިތުންނާ އެކު" މި ނަމުގައި ރައީސުލްޖުމްހޫރިއްޔާގެ އޮފީހުން ކުރިއަށްގެންދާ ޕޮޑްކާސްޓްގައި ވާހަކަފުޅު ދައްކަވަމުންނެވެ.

ރައީސްގެ ވާހަކަފުޅުގައި ވަނީ ތެލަސީމިއާ ސެންޓަރުގައި ހުރި މައްސަލަތަކާއި އެ މައްސަލަތައް ޙައްލު ކުރެއްވުމަށް މިހާރު ނިންމަވާފައިވާ ކަންކަން ޙިއްސާކުރައްވާފައެވެ. އެގޮތުން، ތަނުގެ ހިންގުން ރަނގަޅުކުރުމަށްޓަކައި ތެލެސީމިއާ ސެންޓަރަށް ބޭނުންވާ އިތުރު މުވައްޒަފުން ހޯދުމަށް މިހާރު އިޢުލާން ކުރައްވާފައިވާ ކަމަށް ރައީސް ވަނީ ވިދާޅުވެފައެވެ. އެގޮތުން، އެ ސެންޓަރަށް ބޭނުންވާ ނަރުހުން ހޯދުމަށް މިހާރު އިޢުލާނުކޮށްފައިވާ ކަމަށާއި، މިކަމުގެ ސަބަބުން މިހާރު ސެންޓަރުގައި މަސައްކަތްކުރާ ނަރުހުންގެ މަސައްކަތްތަކަށް ލުއިފަސޭހަކަމެއް ލިބިގެންދާނެ ކަމަށް ވެސް ރައީސް ވަނީ ފާހަގަކުރައްވާފައެވެ.

މީގެ އިތުރުން ރައީސް ވިދާޅުވީ، ތެލެސީމިއާ ސެންޓަރުގައި ޓެސްޓުތައް ހެދުމަށް ބޭނުންވާ ވަޞީލަތްތައް ހަމަ ކުރުމަށް ވެސް މިހާރު ބަޖެޓެއް ކަނޑައަޅުއްވާފައިވާ ކަމަށެވެ. އަދި މި ބަޖެޓުގެ ދަށުން ވަރަށް އަވަހަށް އެ ސެންޓަަރަށް ބޭނުންވާ ވަޞީލަތްތައް ހަމަވެގެންދާނެ ކަމަށް ވެސް ރައީސް ވަނީ ވިދާޅުވެފައެވެ. ރައީސް ވިދާޅުވީ، މާލޭގައި މިހާރު ހުރި ތެލަސީމިއާ ސެންޓަރުގެ އިމާރާތުގެ ހާލަތު ދަށްވުމުގެ ސަބަބުން އެ ސެންޓަރުގެ މަސައްކަތްތައް ހުޅުމާލޭގައި ހުންނަ "އޮރެންޖު ހިޔާ" އަށް ބަދަލުކުރެއްވުމުގެ މަސައްކަތްތަށް ކުރެވެމުންދާ ކަމަށެވެ. 

ރައީސުލްޖުމްހޫރިއްޔާ ވިދާޅުވީ، ހުޅުމާލޭގައި ހުންނަ "އޮރެންޖު ހިޔާ" ގެ މަސައްކަތްތައް މިހާރު ވަނީ ސިފައިންނަށް ހަވާލުކޮށްފައި ކަމަށެވެ. އެގޮތުން، މި މަސައްކަތްތައް މިމަހުގެ 28 ވަނަ ދުވަހު ފަށާނެ ކަމަށާާއި، އަންނަ އޭޕްރިލް މަހުގެ ނިޔަލަށް މި މަސައްކަތްތައް ނިންމުމަށްފަހު، އެތަން ހުޅުވާލެވޭނެ ކަމަށް އެމަނިކުފާނު ވަނީ ވިދާޅުވެފައެވެ. މީގެ އިތުރުން، މި މަސައްކަތަކީ މިހާރު ޤައުމީ މަސައްކަތެއްކަން ރައީސް ވަނީ ފާހަގަކުރައްވާފައެވެ. 

ރައީސުލްޖުމްހޫރިއްޔާ ވިދާޅުވީ، ހުޅުމާލޭގައި ތެލެސީމިއާ ސެންޓަރު ހުޅުވުމަށް ފަހު، އެތަނުން ފަރުވާ ހޯއްދެވުމަށް މާލެއިން ވަޑައިގަންނަވާ ކުދިންނާއި އެކުދިންގެ ބެލެނިވެރިންނަށް އެމްޓީސީސީގެ ބަހުގެ ޚިދުމަތް ހިލޭ ލިބިގެންދާނެ ކަމަށެވެ. ހަމަ އެހެންމެ، އެމްޓީސީސީގެ ބަސް ސްޓޮޕެއް އެ ސަރަޙައްދުގައި ޤާއިމްކޮށްދެއްވާނެ ކަމަށް ވެސް ރައީސް ވަނީ ފާހަގަކުރައްވާފައެވެ.

މި މަސައްކަތްތަކާއި އެކު، ތެލެސީމިއާ އަށް ފަރުވާ ހޯދަމުން އަންނަ ކުދިންނަށް ބޮޑެތި ލުއިފަސޭހަތަކެއް ލިބޭނެކަމަށް އުންމީކުރައްވާ ކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.

މި ލިޔުން ކިޔާލުމުން

Ads by MSS