Ads by Exprox

ޚަބަރު

ދުންފަތުގެ އިސްތިޢުމާލުގެ ތެރެއަށް ވަންނަ ކުދިންގެ ރައްކާތެެރިކަމަށް "ޖެނެރޭޝަން ބޭން" ގެ ފިޔަވަޅުތަކެއް އެޅުއްވުމަށް ނިންމަވައިފިން: ރައީސް

ދުންފަތުގެ އިސްތިޢުމާލުގެ ތެރެއަށް ވަންނަ ކުދިންގެ ރައްކާތެެރިކަމަށް "ޖެނެރޭޝަން ބޭން" ގެ ފިޔަވަޅުތަކެއް އެޅުއްވުމަށް ނިންމަވައިފިން: ރައީސް

ރައީސުލްޖުމްހޫރިއްޔާ "ރައްޔިތުންނާ އެކު" ޕޮޑްކާސްޓްގައި ވާހަކަފުޅު ދައްކަވަނީ/ފޮޓޯ: ރައީސް އޮފީސް

27 މާރިޗު 2025، 02:18

ދުންފަތުގެ އިސްތިއުމާލުގެ ތެރެއަށް އަލަށް ވަންނަ ކުދިން އެކަމުން ރައްކާތެރިކުރުމަށް "ޖެނެރޭޝަން ބޭން" ގެ ގޮތުގައި ފިޔަވަޅުތަކެއް އެޅުއްވުމަށް ނިންމަވާފައިވާކަމަށް ރައީސުލްޖުމްހޫރިއްޔާ ޑރ. މުޙަމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިފަދައިން ވިދާޅުވީ "ރައްޔިތުންނާ އެކު" މި ނަމުގައި ރައީސުލްޖުމްހުރިއްޔާގެ އޮފީހުން ކުރިއަށްގެންދާ ޕޮޑްކާސްޓްގައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާ ވަނީ ދުންފަތުގެ އިސްތިއުމާލުކުރުން ރާއްޖޭގައި ކޮންޓްރޯލްކުރުމަށް މިހާރު އަޅުއްވާފައިވާ ހަރުދަނާ ފިޔަވަޅުތަކާއި، ކުރިއަށް އޮތް ތަނުގައި އަޅުއްވަން ނިންމަވާފައިވާ މުހިންމު ފިޔަވަޅުތައް ހިއްސާކުރައްވާފައެވެ. އެގޮތުން، ޒުވާން ކުދިންނާއި އަލަށް ދުންފަތުގެ އިސްތިއުމާލު ކުރުމުގެ ތެރެއަށް ވަންނަ ކުދިން އެކަމުން ދުރުކުރުމަށް މުހިންމު ފިޔަވަޅުތަކެއް އަޅުއްވާނެ ކަމަށް ރައީސް ވަނީ ވިދާޅުވެފައެވެ. 

މިކަމާއި ގުޅިގެން ރައީސް ވިދާޅުވީ، "ޖެނެރޭޝަން ބޭން" ގެ ގޮތުގައި މުހިންމު ފިޔަވަޅުތަކެއް އެޅުއްވުމުގެ ސަބަބުން ޒުވާން ކުދިންގެ މުޅި ޙަޔާތް އެކަމުން ދުރުކޮށް ދުންފަތުގެ އިސްތިއުމާލުން ސަލާމަތްވުމަށް ބާރު އެޅިގެންދާނެ ކަމަށެވެ. އަދި ދުންފަތާއި ގުޅޭގޮތުން އަޅުއްވާ މުހިންމު ފިޔަވަޅުތަކަކީ، އެއްވެސް ޙާލެއްގައި ރައްޔިތުންނަށް އުނދަގޫ ކުރުމުގެ މަޤްސަދުގައި ކުރާ ކަމެއް ނޫންކަން ރައީސް ވަނީ ފާހަގަކުރައްވާފައެވެ. އެހެންކަމުން، މިކަމުގެ ސަބަބުން ރައްޔިތުން ދުޅަހެޔޮ ދިރިއުޅުމަކަށް ގެންދެވޭނެކަމަށް ރައީސް ވަނީ ވިދާޅުވެފައެވެ.

މީގެ އިތުރުން ރައީސް ވިދާޅުވީ، ޖެނެރޭޝަން ބޭންގެ ފިޔަވަޅުތަކަކީ ދުނިޔޭގެ އެކި ޤައުމުތަކުގައި އަލަށް ދުންފަތުގެ އިސްތިއުމާލުގެ ތެރެއަށް ވަންނަ ކުދިން އެކަމުން ރައްކާތެރިކުުރުމަށް އަޅަމުންދާ ފިޔަވަޅެއް ކަމަށެވެ. އަދި މިކަމާއި ގުޅޭ އިތުރު ތަފްޞީލު ފަހުން ޙިއްޞާކުރައްވާނެކަމުގައި ރައީސް ވަނީ ވިދާޅުވެފައެވެ.

މި ލިޔުން ކިޔާލުމުން

Ads by MSS