Ads by Exprox

ޚަބަރު

ކުރިއަށް އޮތް ދެމަސް ދުވަހުގެ ތެރޭގައި ރާއްޖޭގެ ރަށްތަކުގައި 550 އަށް ވުރެ ގިނަ މަޝްރޫޢުގެ މަސައްކަތް ފެށިގެންދާނެ: ރައީސް

ކުރިއަށް އޮތް ދެމަސް ދުވަހުގެ ތެރޭގައި ރާއްޖޭގެ ރަށްތަކުގައި 550 އަށް ވުރެ ގިނަ މަޝްރޫޢުގެ މަސައްކަތް ފެށިގެންދާނެ: ރައީސް

ރައީސުލްޖުމްހޫރިއްޔާ "ރައްޔިތުންނާ އެކު" ޕޮޑްކާސްޓްގައި ވާހަކަފުޅު ދައްކަވަނީ/ފޮޓޯ: ރައީސް އޮފީސް

27 މާރިޗު 2025، 03:15

ކުރިއަށް އޮތް ދެމަސް ދުވަހުގެ ތެރޭގައި ރާއްޖޭގެ އެކި ރަށްތަކުގައި 550 އަށްވުރެ ގިނަ މަޝްރޫއުގެ މަސައްކަތް ފެށިގެންދާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިފަދައިން ވިދާޅުވީ، "ރައްޔިތުންނާ އެކު" މި ނަމުގައި ރައީސުލްޖުމްހޫރިއްޔާގެ އޮފީހުން ކުރިއަށްގެންދާ ޕޮޑްކާސްޓްގައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާ ވިދާޅުވީ، ރާއްޖޭގެ ހުރިހާ ރަށެއް ހިމެނޭގޮތަށް ކުރިއަށް އޮތް ދުވަސްތަކުގައި މަޝްރޫޢުތައް ކުރިއަށް ގެންދަވަން ފަށްޓަވާނެ ކަމަށެވެ. އެގޮތުން، އަދި މި މަޝްރޫޢުތަކުގެ މަސައްކަތްތައް އެކި ފަރާރްތަކާއި ހަވާލުކޮށް، 550 އަށް ވުރެ ގިނަ މަޝްރޫޢުގެ މަސައްކަތް ބާރު ސްޕީޑުގައި ކުރިއަށްދާނެ ކަމަށް ރައީސް ވަނީ ވިދާޅުވެފައެވެ. މީގެ އިތުރުން ރައީސުލްޖުމްހޫރިއްޔާ ވިދާޅުވީ، ކުރިއަށް އޮތް ދުވަސްތަކުގައި ރައްޔިތުންނަށް ފެނިގެންދާނީ ރައްޔިތުންނަށް ބޭނުންވާ ކަންކަން ރާއްޖޭގެ އިގްތިސާދު މެނޭޖްކުރަމުން، ރައްޔިތުންނަށް ލުއިފަސޭހަވާގޮތަށް ކުރަމުންދާތަން ކަމަށެވެ.

ރައީސް ވިދާޅުވީ، ކުރިއަށް އޮތް ދެ އަހަރު ދުވަހުގެ ތެރޭގައި ރާއްޖޭގެ ހުރިހާ ރަށެއްގައި ކުޑަކުދިންގެ ޕާކެއް ތަރައްޤީ ކުރެވިގެންދާނެ  ކަމަށެވެ. ހަމަ އެހެންމެ، ކުޅިވަރުގެ ވަޞީލަތްތައް ހިމެނޭހެން ކޮންމެ ރަށެއްގައިވެސް ކުރިއަށް އޮތް ދެ އަހަރު ދުވަހުގެ ތެރޭގައި ފިޓްނަސް ސެންޓަރު ތަރައްޤީކުރެވޭނެ ކަމަށްވެސް އެމަނިކުފާނު ވަނީ ވިދާޅުވެފައެވެ. މީގެ އިތުރުން، މަސްވެރިންނަށް ހެޔޮ އަގުގައި ތެޔޮ ލިބޭނެ ގޮތްތަކެއް ހަމަޖައްސަވައިދެއްވުމަކީ، މުހިންމު ކަމެއްގެ ގޮތުގައި ރައީސް ވަނީ ފާހަގަކުރައްވާފައެވެ. އަދި މިކަމަށް ޙައްލެއް ގެނައުމުގެ ގޮތުން، ރާއްޖޭގެ ކޮންމެ އަތޮޅެއްގައި މަދުވެގެން އެއް ރަށުން އެސްޓޯއޯއިން ވިއްކާ އަގުގައި ތެޔޮ ލިބޭނެ އިންތިޒާމުތައް ހަމެޖެހިގެންދާނެ ކަމަށް އެމަނިކުފާނު ވިދާޅުވިއެވެ.

ކުރިއަށް އޮތް ދެއަހަރު ދުވަހުގެ ތެރޭގައި ރާއްޖޭގައި ތަރައްޤީގެ ގިނަ މަޝްރޫޢުތަކެއް ހިންގެވުމަށް ސަރުކާރުގެ މިއަހަރުގެ ބަޖެޓުގައި ވެސް ވަނީ ހިމަނުއްވާފައެވެ.

މި ލިޔުން ކިޔާލުމުން

Ads by MSS