ރައީސުލްޖުމްހޫރިއްޔާގެ ދެކަނބަލުން ޢީދު ސަލާން ކުރައްވައިފި

ބަރަކާތްތެރި ފިޠުރު ޢީދުގެ މުނާސަބަތުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ދެކަނބަލުން މިއަދު ޢީދު ސަލާން ކުރައްވައިފިއެވެ. 

ރައީސުލްޖުމްހޫރިއްޔާ އާއި އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދު، ޢީދުގެ ތަޙުނިޔާ ވިދާޅުވެ ޢީދު ސަލާން ކުރެއްވުން އޮތީ، މިއަދު ހެނދުނު 09:00 އިން 11:00 އަށް ރައީސުލްޖުމްހޫރިއްޔާގެ ރަސްމީ ގެ، މުލީއާގޭގައެވެ.

ޢީދު ސަލާން ކުރެއްވުމަށް ރައީސުލްޖުމްހޫރިއްޔާގެ ދެކަނބަލުންގެ އަރިހަށް ވަނީ އާންމު ރައްޔިތުންގެ ގިނަ ބަޔަކާއި، ވަޒީރުންނާއި، ރައްޔިތުންގެ މަޖިލީހުގެ މެންބަރުންނާއި އަދި ރާއްޖޭގައި ތިއްބެވި ބޭރު ދައުލަތްތަކުގެ ޢިއްޒަތްތެރިން ވަޑައިގަންނަވާފައެވެ.

President Dr @MMuizzu and First Lady Madam @sajidhaamohamed meets members of the public to extend Eid al-Fitr greetings. The gathering was held at Mulee’aage, the official residence of the President. Cabinet Ministers, senior Government officials, Members of Parliament, foreign… pic.twitter.com/XLuTtKy74s

— The President's Office (@presidencymv) March 30, 2025

ޢީދުގެ އުފާ ފާޅުކުރުމުގެ ގޮތުން ސަރުކާރުން ވަނީ ގިނަ ހަރަކާތްތަކެއް ރާވާފައެވެ. އެގޮތުން "ޢީދު އަލި"ގެ ނަމުގައި ކުރިއަށްގެންދާ ޢީދަށް މާލެއާއި ރާއްޖޭގެ ރަށްރަށް ކުލަގަދަ ބޮކިތަކުން ދިއްލާލުން ހިމެނެއެވެ. 

މި އަހަރުގެ ފިޠުރު ޢީދާއި ދިމާކޮށް ކޮންމެ އަތޮޅަކުން ދެ ރަށެއް ދިއްލާ ގޮތައް ވަނީ ނިންމާފައެވެ. އެގޮތައް ނިންމާފައިވަނީ މިދިޔަ އަހަރު "ޢީދު އަލި" ޕްރޮގްރާމަށް ލިބުނު ތަރުހީބާއި ގުޅިގެނެވެ.

މީގެ އިތުރުން، ސަރުކާރުގެ ބައެއް ވުޒާރާތަކާއި އެކި މުއައްސަސާތަކާއި ސަރުކާރު ހިއްސާވާ ކުންފުނިތައް ގުޅިގެން މިއަދު ހަވީރު ފޯރިގަދަ ހަރަކާތްތަކެއް ކުރިއަށްގެންދިއުމަށް ވެސް އަންނަނީ ތައްޔާރުވަމުންނެވެ. އޭގެތެރޭގައި އެމްއެންޑީއެފްގެ އެކި ވިންގްތަކުގެ ހަރަކާތްތަކާއި ފުލުހުންގެ ޚިދުމަތުން ކުރިއަށްގެންދާ އެކި ހަރަކާތްތައްވެސް ހިމެނެއެވެ. މި ހަރަކާތްތައް ބޭއްވުމަށް ހަމަޖެހިފައިވަނީ ސަލްޓަން ޕާކު ސަރަޙައްދާއި، ޝަހީދުންގެ ބިނާ ކުރިމަތީގައާއި ޖުމްހޫރީ މައިދާނުގައެވެ.