ރައީސުލްޖުމްހޫރިއްޔާ އިސްލާމީ ޤައުމުތަކުގެ ވެރީންނަށް ޢީދުގެ ތަޙުނިޔާ ފޮނުއްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އިސްލާމީ ޤައުމުތަކުގެ ވެރީންނަށް، 1446 ވަނަ އަހަރުގެ ފިޠުރު ޢީދުގެ ތަޙުނިޔާ ފޮނުއްވައިފިއެވެ.

އިސްލާމީ ޤައުމުތަކުގެ ވެރީންގެ އިތުރުން، ރައީސުލްޖުމްހޫރިއްޔާ ވަނީ އިސްލާމީ ޤައުމުތަކުގެ ސަރުކާރުތަކާއި އަދި ރައްޔިތުންނަށް، ދިވެހި ސަރުކާރާއި ރައްޔިތުންގެ ނަމުގައި ހެޔޮއެދުމާއި ތަހުނިޔާ ފޮނުއްވައިފިއެވެ.

ރައީސުލްޖުމްހޫރިއްޔާ އެކިއެކި ބޭފުޅުންނަށް ވަކިވަކިން ފޮނުއްވެވި މި މެސެޖުތަކުގައި، އިޖުތިމާޢީ ގުޅުންތައް ބަދަހިކުރެއްވުމަށް ވަނީ ގޮވާލައްވާފައެވެ. އަދި ހެޔޮކަމުން ފުރިގެންވި މި ދުވަހަކީ ބަރަކާތްތެރި ރަމަޟާން މަހުގެ ހަނދާން އައުކޮށް، އޯގާތެރިކަމާއި ޞަދަޤާތުގެ ރިވެތި ސިފައާއި ގުޅިގެން އިސްލާމް ދީނުގައިވާ އުނގަންނައިދިނުންތަކާ މެދު ވިސްނާނެ ދުވަހަކަށް ވާނެ ކަމަށް އުންމީދު ކުރައްވާ ކަމުގައި ވިދާޅުވިއެވެ.

މި މެސެޖުތަކުގައި ރައީސުލްޖުމްހޫރިއްޔާ ވަނީ އިސްލާމީ ޤައުމުތަކުގެ ވެރިންނަށާއި ރައްޔިތުންނަށް އިތުރު ފަހި ފުރުޞަތާއި ތަނަވަސްކަމާއި އުފާވެރިކަމާއި ކާމިޔާބީގެ މަތިވެރި ނިޢުމަތް، މާތް الله މިންވަރު ކުރެއްވުން އެދިވަޑައިގެން ދުޢާކުރައްވާފައެވެ.

ފިޠުރު ޢީދު ދުވަހާ ގުޅިގެން ރައީސުލްޖުމްހޫރިއްޔާގެ ދެކަނބަލުން ވަނީ މިއަދު ޢީދު ސަލާން ވެސް ކުރައްވާފައެވެ. ޢީދު ސަލާން ކުރެއްވުމަށް ގިނަ އަދަދެއްގެ ރައްޔިތުންނާއި، ވަޒީރުންނާއި، ރައްޔިތުންގެ މަޖިލީހުގެ ބައެއް މެންބަރުން ވެސް ވަނީ މުލީއާގެއަށް ވަޑައިގަންނަވާފައެވެ.