ސަރުކާރުގެ ފަރާތުން ޢީދު ފާހަގަ ކުރުމަށް ބޭއްވި ހަރަކާތްތަކުގައި ބައިވެރިވި މުއައްސަސާތަކަށް ރައީސް ޝުކުރު އަދާކުރައްވައިފި

ފިޠުރު ޢީދުގެ މުނާސަބަތުގައި މާލެ ސަރަޙައްދުގައި ސަރުކާރުގެ އެކި އިދާރާތަކުން ބައިވެރިވެފައިވާތީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒު އެކަން ފާހަގަކުރައްވައި އެއިދާރާތަކަށް ޝުކުރުއަދާކުރައްވައިފިއެވެ. 

އެގޮތުން އެމަނިކުފާނު އެކްސްގައި ކުރައްވަވައިފައިވާ ޕޯސްޓެއްގައި ވިދާޅުވެފައިވަނީ 1446 ވަނަ އަހަރުގެ ފިޠުރު ޢީދު ކުލަގަދަކޮށް ފާހަގަ ކުރުމުގެ އިންތިޒާމްކުރައްވައި، ކުޑަކުދިންނާއި އާއިލާތަކަށް އުފާަވެރިކަން ގެނެސްދިނުމުގައި ބައިވެރިވެލެއްވި އެންމެހާ ފަރާތްތަކަށް ޝުކުރުއަދާކުރައްވާ ކަމަށެވެ. 

pic.twitter.com/xqruPQPnle

— Dr Mohamed Muizzu (@MMuizzu) April 1, 2025

ސަރުކާރުގެ ފަރާތުން ޢީދު ފާހގަކުރުމަށް ހިންގި ހަރަކާތްތަކުގައި ސަރުކާރުގެ ގިނަ މުއައްސަސާތަކުން ބައިވެރިވެފައިވެއެވެ.

އެގޮތުން އިސްލާމީ ކަންތައްތަކާއި ބެހޭ ވުޒާރާ، ސިޓީތަކާއި އިދާރީ ދާއިރާތަކާ ބެހޭ އިދާރާ، ދިވެހި ފުލުހުން، ދިވެހި ޢަސްކަރިއްޔާ، އެސްޓީއޯ، އެމްޓީސީސީ، ދިވެހިބަހާއި ތަރިކައާއި ބެހޭ ވުޒާރާ، ކުޅިވަރާ ބެހޭ ވުޒާރާ، އެމްޑަބްލިޔުއެސްސީ، އެމްއޭސީއެލް، ވެމްކޯ، ސްޓެލްކޯ، އެމްޕީއެލް، އާރްޑީސީ، އެޗްޑީސީ އަދި ޕީއެސްއެމް ހިމެނެއެވެ. 

ސަރުކާރުގެ ކުންފުނިތަކާއި ފުލުހުންނާއި ސިފައިން ގުޅިގެން ވަނީ ޢީދު ދެދުވަހު ކުޑަކުދިންނާއި ޢާއިލާތަކަށް ޚާއްސަކޮށް ޢީދު ޙަވީރެއް އިންތިޒާމް ކޮށްގެން ކުރިއަށް ގެންގޮސްފައެވެ. މިހަވީރަށް ޢާންމުންގެ ފަރާތުން ލިބުނު ތާއީދާއެކު މިޢީދު ހަވީރުގެ ހަރަކާތްތައް މިއަދުވެސް ކުރިއަށް ގެންދިޔުމަށް ވަނީ ނިންމާފައެވެ.

އެޗްޑީސީގެ ފަރާތުން ހުޅުމާލޭގައި ޑްރޯން ޝޯއަކާއި އެކު ހަވާއެރުވުންވެސް ކުރިއަށް ގެންގޮސްފައިވެއެވެ.