އެމްޑަބްލިޔުއެސްސީ ގެ އަހަރީ ދުވަހުގެ ތަހުނިޔާ ރައީސުލްޖުމްހޫރިއްޔާ ފޮނުއްވައިފި

މޯލްޑިވްސް ވޯޓަރ އެންޑް ސެވަރޭޖް ކޮމްޕެނީ، އެމްޑަބްލިޔުއެސްސީ ގެ އަހަރީ ދުވަހުގެ ތަހުނިޔާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވައިފިއެވެ.

ރައީސުލްޖުމްހޫރިއްޔާ ވަނީ، އެމްޑަބްލިޔުއެސްސީ އަށް 30 އަހަރު ފުރުމާއި ގުޅިގެން، އެ ކުންފުންޏަށް ތަހުނިޔާ ފޮނުއްވުމަށް އެކްސްގައި ޕޯސްޓެއް ހިއްސާކުރައްވާފައެވެ.

މި ޕޯސްޓުގައި އެމަނިކުފާނު ވަނީ، އެމްޑަބްލިޔުއެސްސީއަށް މީގެ ކުރިން ޚިދުމަތް ކޯށްދެއްވާފައިވާ ފަރާތްތަކުގެ އަގުވަޒަންކުރައްވާފައެވެ. ހަމަ އެހެންމެ، މިފަރާތްކުގެ އިތުރުން މިހާރު އެ ކުންފުނީގައި މަސައްކަތްކުރައްވަމުން ގެންދަވާ އެންމެހާ ޚިދުމަތްތެރީންނަށް އެމަނިކުފާނު ވަނީ މަރްޙަބާއާއި ޝުކުރު ދަންނަވާފައެވެ.

މޯލްޑިވްސް ވޯޓަރ އެންޑް ސެވަރޭޖް ކޮމްޕެނީގެ އަހަރީ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ ވެސް އޭޕްރީލް މަހުގެ 1 ވަނަ ދުވަހެވެ.