ހުރިހާ އުމުރެއްގެ މީހުން ޝައުގުވެރިވާނެ ކަންކަން ހިމަނައިގެން ސަލްޓަންޕާކް ތަރައްޤީ ކުރަނީ

ހުރިހާ އުމުރެއްގެ މީހުން ޝައުގުވެރިވާނެ ކަންކަން ހިމަނައިގެން ސަލްޓަންޕާކް ތަރައްޤީ ކުރުމަށް ނިންމާފައިވާކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. 

"ރައްޔިތުންނާ އެކު" ޕޮޑްކާސްޓުގައި ވާހަކަފުޅު ކުރިޔަށް ގެންދަވަމުން ރައީސުލްޖުމްހުރިއްޔާ ވިދާޅުވީ، މިފަދަ ގޮތަކަށް ޕާކު ބަދަލުކުރެއްވުމުގެ ވިސްނުމަކީ، ދުޅަހެޔޮ ސިއްޙަތަކަށް މަގުފައިކުރުމުގެ ގޮތުން އެ ކަމިކުފާނު ނިންމެވި ނިންމެވުމެއް ކަމަށެވެ.

ކުޑަކުދިންގެ ޕާކުތައް އެޅުމަކީ ވެސް ބަލިތަކުން ދުރުކުރުމަށް ވަރަށް މުހިންމު ކަމެއް. ގޭތެރޭގައި ބަންދުވެފަ ތިބުމުގެ ބަދަލުގައި، ކުދިން ބޭރަށް ނެރެ، އާއިލާއާއެކު ގޮސް ހިންހަމަޖެހޭ ތަނެއްގައި ވަގުތުކޮޅެއް ހޭދަކޮށްލާ ހަރަކާތްތެރިވުމަކީ ސިކުނޑިއަށް ވެސް އެކަމުން ހިތްހަމަޖެހުން ލިބޭނެކަމެއް.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވިއެވެ.

އެގޮތުން މާލޭގެ ޕާކުތައް މާރާމާތު ކުރާއިރު ސަލްޓަން ޕާކު މަރާމާތުކުރާނީ ކުރިޔަށް ވުރެ ގިނަ ކަންކަން ހިމަނައިގެންކަމަށް އެ މަނިކުފާނު ވިދާޅުވިއެވެ. ސަލްޓަން ޕާކަށް ގެންނަވަން ވިސްނަވާ ބަދަލުތައް ޙިއްސާ ކުރައްވަމުން ރައީސުލްޖުމްހޫރިއްޔާ ވިދާޅުވީ، އެ ޕާކަކީ ގިނަ ގަސްގަސް ހުންނަ ތަނެއް ކަމުން، އެއް ގަހުން އަނެއްގަހަށް މަތިން ދަތުރުކުރެވި، އެކިކަހަލަ ހަރަކާތްތައް ކުރިޔަށް ގެންދެވޭނެފަދަ ބަދަލުތައް ހިމެނޭނެ ކަމަށެވެ. 

އަދި ސަލްޓަން ޕާކަށް މި ތަރައްޤީ ގެންނަވާނީ ހުރިހާ އުމުރެއްގެ ބޭފުޅުންނަށް ވެސް ވިސްނަވައިގެންކަމަށް އެ މަނިކުފާނު ވިދާޅުވިއެވެ. 

އެއް ގަހުން އަނެއް ގަހަށް ގޮސްލާ ހަދާލެވޭ ގޮތަށް، އެޑްވެންޗަރަސްއޭ މި ކިޔޭކަހަލަ ގޮތަކަށް ބަދަލުތައް ގެންނާނީ. އެހެންވީމާ ބިންމަތީގައި މި އޮންނަ ޕާކުގެ މައްޗަށް އިތުރު ޕާކެއް އަންނާނެކަމަށް ބައްލަވަންވީ.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވިއެވެ.

ހަމައެއާއެކު، އަތޮޅުތެރޭގެ ޕާކުތައް ތަރައްޤީ ކުރެއްވުމުގެ މަސައްކަތް ކުރިޔަށް ގެންދަވާނެކަމަށް ވެސް ރައިސުލްޖުމްހޫރިއްޔާ ވަނީ ވިދާޅުވެފައެވެ.