ޚަބަރު
ރައީސް މުއިއްޒު އެންފީލްޑް ދަނޑަށް ޒިޔާރަތްކުރައްވައި، ރާއްޖޭގެ ފަތުރުވެރިކަމުގެ ކެމްޕެއިން ފައްޓަވައިދެއްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ރާއްޖޭގެ ފަތުރުވެރިކަމުގެ ކެމްޕެއިން ފައްޓަވައިދެއްވުން ފޮޓޯ:ރައީސް އޮފީސް
ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، ރާއްޖެ ޕްރޮމޯޓްކުރުމުގެ މަސައްކަތުގެ ތެރެއިން އިނގިރޭސިވިލާތުގެ ލިވަޕޫލްގައި ހުންނަ މަޝްހޫރު އެންފީލްޑް ފުޓްބޯޅަ ދަނޑަށް ޒިޔާރަތްކުރައްވައިފިއެވެ. މި ޒިޔާރަތަކީ ރާއްޖޭގެ ޓޫރިޒަމް ޕްރޮމޯޓްކުރުމަށް ކުރައްވާ މަސައްކަތުގެ ބައެއްގެ ގޮތުގައި ކުރެއްވި ޒިޔާރަތެކެވެ.
ޕްރިމިއަރ ލީގުގެ މެޗެއްގައި ލިވަޕޫލްއާއި އެވަޓަން ބައްދަލުކުރި މެޗު ބައްލަވާލެއްވުމަށްފަހު، ރައީސް މުއިއްޒު ވަނީ ރާއްޖޭގެ ފަތުރުވެރިކަމުރުވެރިކަމުގެ ކެމްޕެއިން ރަސްމީކޮށް ފައްޓަވައިދެއްވާފައެވެ. މި ކެމްޕެއިނަކީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމް.އެމް.ޕީ.އާރް.ސީ) / ވިޒިޓް މޯލްޑިވްސް އާއި ލިވަޕޫލް އެފް.ސީ ގުޅިގެން ކުރިއަށްގެންދާ ކޯ ބްރޭންޑަޑް އިނީޝިއަޓިވެކެވެ.
ރައީސް މުއިއްޒުގެ މި ޒިޔާރަތުގައި އެންފީލްޑް ސްޓޭޑިއަމްގެ ޚާއްޞަ ޓުއަރއެއް ހެއްދެވިއެވެ. މި ޓުއަރގައި ރައީސް ދަނޑުގެ އެކި ސަރަޙައްދުތަކަށް ޒިޔާރަތްކުރެއްވިއެވެ. އޭގެ ތެރޭގައި ދަނޑުގެ ކައިރީގައި ހުރި ލިވަޕޫލް ކުޅުންތެރިންގެ ޖާޒީތައް ބެއްލެވުމާއި، ކުޅުންތެރިން ތައްޔާރުވާ ސަރަޙައްދުތަކަށް ޒިޔާރަތްކުރެއްވުން ހިމެނެއެވެ.
މީގެ އިތުރުން، ރައީސް މުއިއްޒު ވަނީ ލިވަޕޫލް އެފްސީގެ އިސްވެރިންނާ ބައްދަލުކުރައްވައި، ދަނޑުގެ ޕިޗްސައިޑްގައި ފޮޓޯ ނަންގަވާފައެވެ. އަދި ލިވަޕޫލް އެފްސީގެ ފަރާތުން ރައީސް މުއިއްޒަށް ނަންބަރު 25 ޖާޒީއެއް ހަދިޔާކޮށްފައިވެއެވެ.
ވިޒިޓް މޯލްޑިވްސް އާއި ލިވަޕޫލް ގުޅިގެން ކުރިއަށްގެންދާ މި ކެމްޕެއިންގެ ސަބަބުން، ރާއްޖޭގެ ބްރޭންޑް ވާޞިލުވާ މިންވަރު އިތުރުވެ، ރާއްޖެ އަންނަ ފަތުރުވެރިންގެ އަދަދު އިތުރުވުމުގެ އިތުރުން، ދިވެހިރާއްޖެއަށް މުހިންމު އިޤްތިޞާދީ މަންފާތަކެއް ލިބޭނެ ކަމަށް އުންމީދުކުރެވެއެވެ.