ދުންފަތް ބޭން ކުރުމުގެ މަސައްކަތުގައި އާންމު ރައްޔިތުންގެ ޚިޔާލަށް ރައީސް އެދިވަޑައިގެންފި

ޒުވާން ޖީލު ދުންފަތާ ދުރުކުރުމުގެ ގޮތުން، ޖެނެރޭޝަން ބޭން ކަނޑައަޅާނެ އުމުރެއްގެ ޚިޔާލު ހޯއްދެވުމަށް، ރައީސުލްޖުމްހޫރިޔާ ޑޮކްޓަރ މުޙައްމަދު މުޢިއްޒު ޕޯލެއް ހުޅުވާލައްވައިފިއެވެ. އެ މަނިކުފާނު މި ޕޯލް ހުޅުވާލައްވާފައި ވަނީ އެކްސްގައެވެ.

ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި، މިއީ މިފަދަ ކަމެއްގައި ރައްޔިތުންގެ ޚިޔާލު ހޯއްދެވުމަށް ދިވެހިރާއްޖޭގެ ރައީސަކު ސޯޝަލް މީޑިއާގެ މަންސައެއް ބޭނުންކުރާ ފުރަތަމަ ފަހަރު ވެސް މެއެވެ.

If a generational ban on smoking were to be implemented in the Maldives, to protect the health of our youth and future generations from the harmful effects of smoking, which of the following would be the most appropriate starting point?

— Dr Mohamed Muizzu (@MMuizzu) April 3, 2025

ސޯޝަލް މީޑިއާގައި ރައީސުލްޖުމްހޫރިއްޔާ ޙިއްސާކުރެއްވި ޕޯލްގައި ވަނީ، ޖެނެރޭޝަން ބޭން ކަނޑައެޅުމަށް އެ މަނިކުފާނު ވިސްނަވާ ތިން އުމުރުފުރާގެ ތެރެއިން ކޮންމެވެސް އެއް އުމުރުފުރާއަކަށް ހިޔާލު ފާޅުކުރުމަށް ހުޅުވާލާފައެވެ.

ޖެނެރޭޝަނަލް ބޭން، ކަނޑައެޅުއްވުމުގައި އެ މަނިކުފާނު ހުށައަޅުއްވާ ގޮތްތަކަކީ:

•  2007 ވަނަ އަހަރުގެ ޖެނުއަރީ 1އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން
•  2004 ވަނަ އަހަރުގެ ޖެނުއަރީ 1އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން
•  2000 ވަނަ އަހަރުގެ ޖެނުއަރީ 1އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން

ރައީސުލްޖުމްހޫރިއްޔާ ވަނީ ދުންފަތުގެ އިސްތިއުމާލުކުރާ އެހެނިހެން އުމުރުފުރާތަކުގެ މީހުންވެސް އެ އާދަ ދޫކޮށްލުމަށް އިލްތިމާސްކުރައްވާފައެވެ. އަދި ރާއްޖެއަށް ދުންފަތުގެ ބާވަތްތައް އެތެރެކޮށް، ވިޔަފާރި ކުރާ ފަރާތްތަކުން އެކަން ހުއްޓާލުމަށްވެސް އެމަނިކުފާނު އިލްތިމާސްކުރެއްވިއެވެ.