ޚަބަރު
ރާއްޖޭގެ ރައީސާއި އެންފީލްޑުން ބައްދަލުވުމަކީ ލިބުނު ބޮޑު އުފަލެއް: އިއާން ރަޝް
ރައީސުލްޖުމްހޫރިއްޔާ އާއި އިއާން ރަޝް ބައްދަލުކުރުން، ފޮޓޯ: ރައީސް އޮފީސް
ދިވެހިރާއްޖޭގެ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އާއި އެންފީލްޑުން ބައްދަލުވުމަކީ ލިބުނު ބޮޑު އުފަލެއްކަމުގައި، ލިވަޕޫލް ފުޓުބޯޅަ ކްލަބުގެ އެމްބަސަޑަރެއްގެ ގޮތުގައި މަސައްކަތްކުރަމުން އަންނަ، އެ ކްލަބުގެ ލެޖެންޑު އިއާން ރަޝް ބުނެފިއެވެ.
އިންސްޓަގްރާމްގައި ޙިއްސާކުރި ޕޯސްޓެއްގައި، ލިވަޕޫލްގެ އެމްބަސަޑަރެއްގެ އިތުރުން ކްލަބުގެ އެކަޑެމީތަކާއި ޕަބްލިކް ރިލޭޝަންސްގެ މަސައްކަތްތަކުގައި ޝާމިލުވަމުން އަންނަ ރަޝް ބުނީ، މިފަދަ ޕާޓްނާޝިޕްތަކަކީ ދެ ފަރާތަށް ވެސް އެކަމުން ފައިދާކުރާނެ ކަންކަން ކަމަށެވެ.
އަދި ލިވަޕޫލްގެ 200 މިލިއަނަށް ވުރެ ގިނަ މީހުންގެ ފޭން ބޭސްއެއް ސޯޝަލް މީޑިއާގައި އޮތުމާއި، މިދިޔަ ސީޒަނުގައި އެ ކަލްބުގެ ކޮންޓެންޓުތަކަށް 12 ބިލިއަން ވިއުޒް ލިބިފައި އޮތުމަކީ، މި ޕާޓްނާޝިޕާއެކު ދިވެހިރާއްޖެ ދުނިޔެއަށް އިޝްތިހާރުވެގެންދާނެ ކަމުގެ ހެއްކެއް ކަމަށް ވެސް އޭނާ ވަނީ ހާމަކޮށްފައެވެ.
މީގެ އިތުރުން ވިޒިޓް މޯލްޑިވްސްއާއެކު ހެދި މި ޕާޓްނަޝިޕަކީ ހަމައެކަނި ފަތުރުވެރިކަން އިޝްތިހާރު ކުރުން ނޫން ކަމަށާއި، މި ޕާޓްނާރޝިޕްގެ ދަށުން، ކަނޑުގެ ދިރުންތައް ހިމާޔަތްކުރުމާއި، ދެމެހެއްޓެނިވި ފަތުރުވެރިކަމާ ގުޅުންހުރި ކަންކަމަށް މަސައްކަތް ކުރެވިގެންދާނެ ކަމަށް ރަޝް ބުންޏެވެ. އަދި މޫސުމީ ބަދަލުތަކާ ގުޅިގެން ކަނޑުގެ ލޮނުގަނޑު އުފުލުންފަދަ، ތިމާވެއްޓާ ގުޅޭ މައްސަލަތައް ކުޑަކުރެވޭނެ ގޮތްތަކަށް ވެސް މަސައްކަތް ކުރާނެކަމަށް އިއާން ރަޝް ވަނީ ހާމަކޮށްފައެވެ.
އެހެންކަމުން މި ޕާޓްނާޝިޕާއެކު، ލިވަޕޫލްގެ ސަސްޓެއިނެބިލިޓީ ޕްރޮގްރާމް، ދަ ރެޑް ވޭގެ ދަށުން އެވެއާރނެސް އިތުރުކޮށް ފައިދާހުރި ބަދަލުތައް ގެނައުމަށް މަސައްކަތް ކުރެވިގެން ދާނެއެވެ.
ލިވަޕޫލް އާއި ވިޒިޓް މޯލްޑިވްސްގެ މި ޕާޓްނާރޝިޕްގެ ދަށުން، ރާއްޖެ އިސްތިހާރު ކުރުމުގެ މަސައްކަތް ވަނީ މިހާރު ރަސްމީކޮށް ފަށާފައެވެ. މިކަމަށް ޙާއްސަކޮށް އޮތް ރަސްމިއްޔާތު އޮތީ ޕްރިމިއަރ ލީގުގައި ލިވަޕޫލް އާއި އެވަޓަން ބައްދަލުކުރި މެޗުގައެވެ.
