ޤައުމީ ތަރައްޤީގެ މާސްޓަރޕްލޭންއަށް އޮސްޓްރޭލިއާގެ ފަންނީ އެހީ ހޯދަނީ!

20 އަހަރުގެ ޤައުމީ ތަރައްޤީގެ މާސްޓަރޕްލޭންއަށް އޮސްޓްރޭލިއާގެ ފަންނީ އެހީ ހޯދަން ދެޤައުމުގެ ދެމެދުގައި އެއްބަސްވުމެއްގައި ސޮއިކޮށްފިއެވެ.

މިއަދު ގެދޮރިވެރިކަމާ ބިމާއި ޢުމްރާނީ ތަރައްޤީއާ ބެހޭ ވުޒާރާގައި މެންދުރުފަހު ބޭއްވި ރަސްމިއްޔާތެއްގައި ވަނީ 20 އަހަރުގެ ޤައުމީ ތަރައްޤީގެ މާސްޓަރ ޕްލޭނެއް އެކުލަވާލުމާއި އެކަމާ ގުޅޭ ފަންނީ އިރުޝާދާއި އެހީތެރިކަން ފޯރުކޮށްދިނުމާ ގުޅޭ ލެޓާ އޮފް އެކްސްޗޭންޖް އެއްބަސްވުމުގައި އޮސްޓްރޭލިއާގެ ސަރުކާރާ އެކު ދިވެހި ސަރުކާރުން ސޮއިކޮށްފައެވެ.

އެ އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ގެދޮރިވެރިކަމާ ބިމާއި ޢުމްރާނީ ތަރައްޤީއާ ބެހޭ ވަޒީރު ޑރ. އަލީ ހައިދަރު އަޙުމަދެވެ. އަދި އޮސްޓްރޭލިއާ ސަރުކާރުގެ ފަރާތުން އެ އެއްބަސްވުމުގައި ސޮއިކުރެއްވީ އެ ޤައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު ޑޭވިޑް ޖެސަޕް އެވެ.

ގެދޮރުވެރިކަމާ ބެހޭ ވުޒާރާއިން ބުނެފައިވަނީ، އޮސްޓްރޭލިއާ ސަރުކާރުން ފަންޑުކުރާ ޔޫއެންޑީޕީގެ އިންޓަގްރޭޓެޑް ގަވަނަންސް ޕްރޮޖެކްޓްގެ ދަށުން މި މަސައްކަތަށް 900،000 އޮސްޓްރޭލިއަން ޑޮލަރު (9.4 މިލިއަން ރުފިޔާ)ގެ އެހީ ރާއްޖެއަށް ދިނުމަށް ހަމަޖެހިފައިވާ ކަމަށެވެ.

ރާއްޖޭގެ 20 އަހަރުގެ ޤައުމީ ތަރައްޤީގެ މާސްޓަ ޕްލޭން އެކުލަވާލުމުގެ މަސައްކަތް ފަށަން ރައީސްގެ ކެބިނެޓުން ނިންމީ މިދިޔަ މަހު އެވެ.

އެ ނިންމުމާ ގުޅޭ ގޮތުން ރައީސް މުއިއްޒު ވިދާޅުވެފައި ވަނީ ކުރިއަށް އޮތް އަހަރު ތެރޭގައި ރައްޔިތުންގެ ފުރިހަމަ ބައިވެރިވުން ހިމެނޭ ގޮތަށް، ހުރިހާ ސިޔާސީ ޕާޓީތަކާއި ޖަމިއްޔާތަކާއި އެކިއެކި ސްޓޭކް ހޯލްޑަރުން އަދި އެކްސްޕާޓުންގެ ބައިވެރިވުން ހިމެނޭ ގޮތަށް އެ ޕްލޭންގެ މަސައްކަތް ފަށާނެ ކަމަށެވެ.

ރައީސުލްޖުމްހޫރިއްޔާ ޑރ. މުޢިއްޒު ވިދާޅުވެފައިވާ ގޮތުގައި، ރާއްޖޭގެ ހުރިހާ ރަށެއްގައި މި ޕްލޭނާ ގުޅޭ މަޝްވަރާތައް ހިނގާނެ އެވެ. އަދި މި ޕްލޭން ބައްޓަންވާނީ ހުރިހާ ރައްޔިތުން ބޭނުންވާ ގޮތަށެވެ.