މުލީ އެއަރޕޯޓަކީ އެކި ދާއިރާތަކުން ކުރިއެރުންތައް ހޯދުމުގެ ދޮރާއްޓެއް: ރައީސް މުޢިއްޒު

މުލީ އެއަރޕޯޓަކީ އެކި ދާއިރާތަކުން ކުރިއެރުންތައް ހޯދުމުގެ ދޮރާއްޓަކަށް ވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މިއަދު މުލީ އެއަރޕޯޓް ރަސްމީކޮށް ހުޅުވައިދެއްވުމަށްފަހު ވާހަކަފުޅު ދައްކަވަމުންނެވެ.

ރައީސް މުޢިއްޒު ވިދާޅުވީ މުލީ އެއަރޕޯޓުގެ ސަބަބުން އެރަށާއި މުޅި މުލަކަތޮޅަށްވެސް ތަރައްޤީގެ ރޮނގުން ގިނަ ކުރިއެރުންތަކެއް ލިބިގެންދާނެ ކަމަށެވެ. އަދި އެ ރަށުގެ ފަތުރުވެރިކަމަށް ފަޅުތެރެއިން އިންވެސްޓްމަންޓް ފުރުސަތުތައް ހޯދައިދެއްވާނެ ކަމަށްވެސް ވިދާޅުވިއެވެ.

މުލީގެ ތަރައްޤީއަށް ގިނަ މަޝްރޫޢުތަކެއް ކުރިއަށް ގެންދަން ނިންމާފައިވާނެ. އޭގެ ތެރޭގައި މަގު ހެދުމާއި ގޮނޑުދޮށް ހިމާޔަތްކުރުމުގެ މަޝްރޫޢުތައް އަންނަ އަހަރުގެ ބަޖެޓުގައި ހިމަނައިގެން ފަށާނަން  

ރައީސް

މީގެ އިތުރުން، މުލީގައި ހުންނަ ރީޖަނަލް ހޮސްޕިޓަލުގެ އައު އިމާރާތުގެ މަސައްކަތް ފެށުމަށް ތައްޔާރުވެފައިވާ ކަމަށާއި، ޑަޔަލިސިސް ފަދަ އިތުރު ޚިދުމަތްތައް ތަޢާރަފުކުރުމަށް ސަރުކާރުން އިސްކަންދޭ ކަމަށްވެސް ރައީސް ފާހަގަކުރެއްވިއެވެ.

ހައުސިންގ ދާއިރާއިން، މުލީގައި 300 ހައުސިންގ ޔުނިޓް އެޅުމަށް ހަމަޖެހިފައިވާ ކަމަށް ރައީސް ހާމަކުރެއްވިއެވެ. އަދި ނާލާފުއްޓާއި މުއްޔާ ގުޅުވާލުމުގެ މަޝްރޫޢު ކުރިއަށްދާ ކަމަށާއި، ނާލާފުށީގެ ބިން ހިއްކައި ބަނދަރު ބޮޑުކުރުމުގެ މަސައްކަތްވެސް އަންނަ އަހަރުގެ ބަޖެޓުގައި ހިމެނޭނެ ކަމަށް ވިދާޅުވިއެވެ.

އަޅުގަނޑުގެ ވަޢުދުތައް ފުއްދުމަށް މަސައްކަތްކުރާނަން. މުލަކަތޮޅުގެ ހުރިހާ ރަށަކަށްވެސް ތަރައްޤީ ގެނެސްދިނުމަކީ އަޅުގަނޑުގެ އަމާޒެއް  

ރައީސް މުޢިއްޒު

މުލީ އެއަރޕޯޓް ހުޅުވުމާއެކު، މުލަކަތޮޅުގެ ރައްޔިތުންނަށް ދަތުރުފަތުރުގެ ފަސޭހަކަމާއެކު، އިޤްތިޞާދީ އަދި އިޖްތިމާޢީ ގޮތުން ގިނަ ކުރިއެރުންތަކެއް ލިބިގެންދާނެއެވެ.