ޚަބަރު
ދޮށީ އުމުރަށް ދާއިރު ކުރިމަރިވާނެ ދަތިތަކަށް ޒުވާނުން ތައްޔާރުކުރުމަށް މަސައްކަތްކުރާނަން: ރައީސުލްޖުމްހޫރިއްޔާ
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ފޮޓޯ: ރައީސް އޮފީސް
ދޮށީ އުމުރަށް ދާއިރު ކުރިމަރިވާނެ ދަތިތަކާއި ގޮންޖެހުންތަކަށް ޒުވާނުން ތައްޔާރުކުރުމަށް މި ސަރުކާރުން މުހިންމު އިސްކަމެއްދީގެން މަސައްކަތްކުރައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ދުނިޔޭގެ އާބާދީ ދުވަހުގެ މުނާސަބާގައި މީސްމީޑިޔާގައި ޙިއްސާކުރެއްވި ޕޯސްޓެއްގައި ރައީސުލްޖުމްހޫރިއްޔާ ވިދާޅުވީ، އާބާދީއާ ގުޅޭ ކަންކަމުގައި ދުރުރާސްތާ ވިސްނުން މުހިންމު ކަމަށާއި، މިކަމާ ގުޅޭ ހަރުދަނާ ސިޔާސަތުތައް އެކުލަވާލަންޖެހޭ ކަމަށެވެ.
މީގެއިތުރުން އެކަށީގެންވާ ބޯހިޔާވަހިކަން ފޯރުކޮށްދީ، ކުޑަކުދިންގެ ފަރުވާ ހަރުދަނާކޮށް، ތަޢުލީމާއި ޞިއްޙީ ފުރުޞަތުތައް ފަހިވެފައިވާ މާޙައުލެއް ޒުވާނުންނަށް ޤާއިމުކުރުމަށް މަސައްކަތްކުރައްވާނެކަމަށް ވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ. އަދި ކައުންސެލިންނާއި ދަރިމައިވުމުގެ ޞިއްޙީ ނިޒާމު ހަރުދަނާކޮށް، ދިރިއުޅުމުގެ ނިންމުންތައް ނިންމުމުގައި ޒުވާނުންނަށް އެހީތެރިކަން ފޯރުކޮށްދޭންޖެހޭކަމަށް ވެސް ވިދާޅުވިއެވެ.
As we commemorate #WorldPopulationDay, let us reflect on the importance of ensuring equal opportunity and well-being for all. By 2062, one-fifth of the Maldivian population is projected to be over the age of 65. In light of this, this administration remains dedicated to shaping a…
— Dr Mohamed Muizzu (@MMuizzu) July 11, 2025
ދުނިޔޭގެ އާބާދީ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ ޖުލައި މަހުގެ 11 ވަނަ ދުވަހުއެވެ. މި ދުވަސް ފާހަގަ ކުރުމުގެ ބޭނުމަކީ އާބާދީއާ ގުޅޭ އެކިއެކި ކަންކަމުގައި މުޖުތަމަޢު ހޭލުންތެރިކުރުވުމެވެ.
މި އަހަރުގެ އާބާދީ ދުވަހުގެ ޝިޢާރެއްގެ ގޮތުގައި ކަނޑައަޅާފައިވަނީ، މިހާރު ގިނަ ޒުވާނުން ތަޙައްމަލު ކުރަމުންދާ ދަރިމައިވުމާ ގުޅޭ މައްސަލަތަކާ ގުޅިގެންނެވެ. އެގޮތުން މި އަހަރުގެ ޝިޢާރަކީ "އިންސާފުވެރި އުންމީދީ މާޙައުލެއްގައި ޢާއިލާތައް ބިނާކުރުމުގެ ފުރުޞަތު ޒުވާނުންނަށް ހޯދައިދިނުން" މިއެވެ.
ޔުނައިޓެޑް ނޭޝަންސް ޕޮޕިޔުލޭޝަން ފަންޑް، ޔޫއެންއެފްޕީއޭއިން ކޮށްފައިވާ ދިރާސާއަކުން ދައްކާ ގޮތުން ގިނަ ދަރިން ބޭނުންވި ނަމަވެސް، ދިމާވާ އިޖުތިމާޢީ، އިޤުތިޞާދީ އަދި ޞިއްޙީ މައްސަލަތަކާއި ހުރަސްތަކާ ގުޅިގެން ދަރިން ނުހޯދިފައި ތިބި 14،000 އެއްހާ މީހުން 14 ޤައުމެއްގައި އެބަތިއްބެވެ.
