ޔޫޕީއައި އާއެކު ދިވެހީނަށް މާލީ މިނިވަންކަމާއި ޑިޖިޓަލް ޒަމާނަށް އިތުރު ހަރުފަތެއް ގިރާކުރުމުގެ ފުރުޞަތު

ޒަމާންތަކެއް ވަންދެން ދިވެހިރާއްޖޭގެ ވިޔަފާރި ތަކުގައި ނަގުދު ފައިސާގެ މުޢާމަލާތްތަކުން ކުރިއަށްދެވިއްޖެއެވެ. މަސްމާރުކޭޓުތަކާއި، ކުދި ފިހާރަތަކާއި، އަދި ކެފޭ ރެސްޓޯރެންޓް ތަކުގައި މީގެ ކުރިން ގިނައިން ފެންނަނީ އަތުން އަތަށް ފައިސާ ބަދަލުކުރާ މަންޒަރެވެ. ނޫޓުތައް އެއްއަތުން އަނެއް އަތަށް ބަދަލުވެ، ފައިސާ ވޮލެޓުގައި ގެނގުޅެވުނެވެ. 

ނަމަވެސް، ޒަމާން ބަދަލުވަމުންދާ ފަދައިން، މީހުން އެއްޗެހި ގަންނަ ގޮތްތައް ވެސް ބަދަލުވަމުން އައިސް ދުނިޔެ މިހާރު ދަނީ ފައިސާ ބޭނުންނުކޮށް ފައިސާ ދެއްކޭނެ ގޮތްތަކަކަށް ބަދަލުވަމުންނެވެ. އަދި ދިވެހިރާއްޖެ ވެސް މިކަމުން އިސްތިސްނާއެއް ނޫނެވެ.

އެހެންވީމާ، ޔޫޕީއައި އަކީ ކޮބައިތޯ، އަދި ދިވެހިން މިކަމާ ޝައުޤުވެރިވާންވީ ކީއްވެ ތޯ؟ އަޅުގަނޑުމެން މި ޓެކްނޮލޮޖީ ދެނެގަތުމަށް ދަތުރެއް ކުރާނީއެވެ. އަދި އަޅުގަނޑުމެންގެ ދިރިއުޅުމަށް މިކަމުން ގެނެސްދޭނެ ބަދަލުތައް ބަލައިލާނީއެވެ.

ތިޔަބޭފުޅުންގެ ފޯނުގައި އެއް ފަހަރު ޓެޕްކޮށްލައިގެން ކާބޯތަކެތި،  ކޮފީ ގަނެވޭނެ، ނުވަތަ ޓެކްސީ ކުލި ދެއްކޭނެ ފުރުޞަތަކާއި މެދު ވިސްނައިލައްވާށެވެ. ޔޫޕީއައި ނިޒާމުގެ އެންމެ ފާހަގަކޮށްލެވޭ ޚާއްޞިއްޔަތަކީ، އެކި ބޭންކުތަކުގެ އެކައުންޓުތައް އެއް އެޕްލިކޭޝަނެއްގެ ދަށުން ބެލެހެއްޓުމުގެ ފުރުޞަތު ލިބިގެންދިއުމެވެ. މި ނިޒާމު ތަޢާރަފުވުމާއެކު، ދިވެހިރާއްޖޭގެ ފައިސާގެ މުޢާމަލާތްތަކަށް އިންޤިލާބީ ބަދަލުތަކެއް އަންނާނެކަން ކަށަވަރެވެ.

ޔޫޕީއައި (ޔުނިފައިޑް ޕޭމަންޓްސް އިންޓަފޭސް) އަކީ ކިއުއާރު ކޯޑު މެދުވެރިކޮށް ހިންގޭ ޑިޖިޓަލް ފައިސާގެ މުޢާމަލާތެކެވެ. މޮބައިލް ބޭންކިންގ ޚިދުމަތް ލިބިފައިވާ ކޮންމެ ފަރުދަކަށްވެސް، އިންޓަނެޓާ ގުޅިފައިވާ ސްމާޓްފޯނެއް ބޭނުންކޮށްގެން ޔޫޕީއައި މުޢާމަލާތްތައް ފަސޭހައިން ކުރެވިދާނެއެވެ. މި މުޢާމަލާތްތައް ހިންގެނީ ޒަމާނީ އިލެކްޓްރޯނިކް ފައިސާ ދެއްކުމުގެ ނިޒާމުތަކުގެ ތެރެއިންނެވެ. އެހެންކަމުން، މިއީ ލުއިފަސޭހަ، އަދި އާންމުކޮށް ބޭނުންކުރެވޭ އެހެނިހެން ފައިސާ ދެއްކުމުގެ ވަސީލަތްތަކާ އަޅާބަލާއިރު އިތުރު މަންފާތަކެއް ލިބިދޭ ނިޒާމެކެވެ.

އިލެކްޓްރޯނިކް ކްލިއަރިންގ ސަރވިސް (އީސީއެސް) އާ އެއްފަދައިން، ޔޫޕީއައި ވެސް ބޭނުންކުރެވެނީ  ރައްކާތެރިކަމާއެކު އޮތެންޓިކޭޓްކޮށް، ކަނޑައެޅިފައިވާ ޤަވާޢިދުތަކެއްގެ މައްޗަށް ބިނާކޮށްފައިވާ އެކްސެސްއަކާ އެކުގައެވެ. މިގޮތުން، ގިނަ ފަހަރު ތަކުރާރުކޮށް ދައްކަންޖެހޭ ފައިސާތައް (މިސާލަކަށް: ޔޫޓިލިޓީ ބިލްތައް، ސްކޫލް ފީ، ސަބްސްކްރިޕްޝަންތައް) އެޕްލިކޭޝަންގައި ހުއްދަ ދިނުމަށްފަހު، އެއްވެސް ދަތިކަމެއްނެތި އޮޓޮމެޓިކުން ދެއްކޭނެއެވެ. މިއީ ވަގުތާއި ހަކަތަ ސަލާމަތްކޮށްދޭ، އަދި ފައިސާގެ މުޢާމަލާތްތައް ހަލުވިކޮށް ހިންގުމަށް މަގުފަހިކޮށްދޭ ނިޒާމެކެވެ.

2016 ވަނަ އަހަރު، އިންޑިއާގެ ނޭޝަނަލް ޕޭމަންޓްސް ކޯޕަރޭޝަން (އެންޕީސީއައި) އިން ޔުނިފައިޑް ޕޭމަންޓްސް އިންޓަރފޭސް (ޔޫޕީއައި) ތަޢާރަފުކުރިއެވެ. މިއީ އިންޤިލާބީ ޑިޖިޓަލް ފައިސާ ދެއްކުމުގެ ނިޒާމެކެވެ. ޔޫޕީއައި އަކީ އިންޑިއާގެ އެންމެހައި ބޭންކުތައް އެއް ޕްލެޓްފޯމެއްގެ ދަށަށް ގެނެސް، ރައްޔިތުންނަށް ސްމާޓްފޯނު މެދުވެރިކޮށް އިންސްޓަންޓް ފައިސާ ޓްރާންސްފަރކޮށް އަދި ލިބިގަތުމުގެ ފުރުޞަތު ފަހިކޮށްދޭ ޑިޖިޓަލް ވަސީލަތެއް ކަމުގައި ބަޔާންކުރެވިދާނެއެވެ.

ޔޫޕީއައި ޕޭންމަންޓް

ޔޫޕީއައި ބޭނުންކޮށްގެން، ކޮންމެ މުޢާމަލާތަކަށް ބޭންކުގެ ތަފްސީލުތައް އަލުން ޖަހަން ނުޖެހޭ ގޮތަށް، އަމިއްލަ ބޭންކު އެކައުންޓުން އެހެން ފަރާތެއްގެ އެކައުންޓަށް ސީދާ ފައިސާ ޓްރާންސްފަރ ކުރެވެއެވެ. މިކަމަށް ބޭނުންވަނީ ހަމައެކަނި ވާރޗުއަލް ޕޭމަންޓް އެޑްރެހެއް (މިސާލަކަށް އީމެއިލް އެޑްރެހެއް) ނުވަތަ ކިއުއާރު ކޯޑެކެވެ. މިއީ ހަފްތާ ބަންދާއި ބަންދު ދުވަސްތައް ހިމެނޭ ގޮތަށް 24 ގަޑިއިރު މެދުނުކެނޑި ޚިދުމަތްދޭ އަދި ސިކުންތުތަކެއްގެ ތެރޭގައި މުޢާމަލާތްތައް ފުރިހަމަކޮށްދޭ ނިޒާމެކެވެ.

މިހާރު ޔޫޕީއައި އަކީ އިންޑިއާގެ ސަރަޙައްދަށް އެކަނި ޙާއްސަ ޚިދުމަތެއް ނޫނެވެ. މިއީ ދުނިޔޭގެ އެކި ކަންކޮޅުތަކުގެ ސަމާލުކަން ހޯދާފައިވާ ބައިނަލްއަޤްވާމީ މާލީ ވަސީލަތެކެވެ.

2023 ވަނަ އަހަރުގެ ފެބްރުއަރީ މަހު، އިންޑިއާގެ ރިޒާވް ބޭންކާއި (އާރްބީއައި) އަދި ސިންގަޕޫރުގެ މަނިޓަރީ އޮތޯރިޓީ (އެމްއޭއެސް) އިން ވަނީ ޔޫޕީއައި އާއި ސިންގަޕޫރުގެ ޕޭނައު އެއްކޮށްލައިގެން އައު ވަރޝަނެއް ތަޢާރަފުކޮށްފައެވެ. ފްރާންސްގައިވެސް ޔޫޕީއައިގެ ބޭނުންހިފަން ފަށާފައިވެއެވެ. އިބްތިދާއީ މަރުޙަލާގައި އޮތްނަމަވެސް، ފްރާންސްގެ ޕޭމަންޓް ސްކީމް ވޯލްޑްލައިން ވަނީ ޔޫޕީއައި އާ ގުޅިގެން ވިޔަފާރިތަކުގެ ޕޮއިންޓް-އޮފް-ސޭލް (ޕީއޯއެސް) ސިސްޓަމްތަކުން ޔޫޕީއައި ޕޭމަންޓްތައް ބަލައިގަތުމަށް މަގުފަހިކޮށްދީފައެވެ. މިއީ ބައިނަލްއަޤްވާމީ  ފެންވަރުގައި ޔޫޕީއައި ތަންފީޒުކުރުމަށް އެޅޭ މުހިންމު ފިޔަވަޅެކެވެ.

ދިވެހިރާއްޖޭގެ އިޤްތިޞާދުގެ މައިގަނޑު ތަނބަކީ ފަތުރުވެރިކަމެވެ. ދުނިޔޭގެ އެކި ކަންކޮޅުތަކުން ފަތުރުވެރިން ޒިޔާރަތްކުރާ މި ޤައުމުގައި ޔޫޕީއައި ތަޢާރަފުކުރުމަކީ، ޚާއްޞަކޮށް މި ނިޒާމާ އާދަވެފައިވާ އިންޑިއާގެ ފަތުރުވެރިންނަށް އިތުރު ޝައުޤުވެރިކަމެއް ގެނުވައިދޭނެ ކަމެކެވެ. މީގެ ސަބަބުން ނަގުދު ފައިސާ ގެންގުޅުމުގެ ދަތިތައް ކުޑަވެ، މާލީ ހާމަކަން އިތުރުވެ، އިޤްތިޞާދުގެ ތެރޭގައި ފައިސާ ދައުރުވާ ގޮތް ފަސޭހައިން ދެނެގަނެވޭނެއެވެ.

އިންޑިއާގެ ތަޖުރިބާއިން ހާމަވާ ގޮތުގައި، ސަރުކާރުން ފަހިކޮށްދޭ ޕޭމަންޓް ނިޒާމުތަކަކީ މިލިއަނުން މީހުންގެ އިޤްތިޞާދީ ޙާލަތު ރަނގަޅުކުރުމަށް މަގުފަހިކޮށްދޭ ވަސީލަތްތަކެކެވެ. މިކަމުގެ މުހިންމުކަން ދުނިޔޭގެ އެކި ޤައުމުތަކުން ވަޒަންކުރަމުންދެއެވެ. ސިންގަޕޫރާއި ފްރާންސްގެ އިތުރުން، 2024 ވަނަ އަހަރުގެ މެދުތެރޭގައި މެދުއިރުމަތީގެ އެތައް ޤައުމެއްގައި ޔޫޕީއައި ތަޢާރަފުކުރުމަށް ދަނީ ތައްޔާރުވަމުންނެވެ.

ދުވަހެއް ދުވަހަކަށް ނަގުދު ފައިސާގެ މުޢާމަލާތްތައް މަދުވަމުންދާކަން ފާހަގަކުރެވެއެވެ. ޓެކްނޮލޮޖީގެ ކުރިއެރުން އަންނަނީ އަލީގެ ބާރުމިނަށްވުރެވެސް އަވަސް ދުވެއްޔެއްގައެވެ. މިއީ އުފާވެރިކަމާއެކު ބަލައިގަންނަންޖެހޭ ކަމެކެވެ. ޔޫޕީއައި މެދުވެރިކޮށް ފައިސާގެ މުޢާމަލާތްތައް ކުރުމަކީ، އޭގެ އަދަދު ކުޑަވިޔަސް ބޮޑުވިޔަސް، އިންޤިލާބީ ބަދަލެއް ގެނުވައިދޭނެ ކަމެކެވެ.

މިހާރު މިވަނީ މި ނިޒާމުގެ ފެށުމުގެ މަރުޙަލާގައެވެ. ނަމަވެސް އަޅުގަނޑުމެން އުންމީދުކުރަނީ މީގެ ސަބަބުން ދިވެހިރާއްޖެ ވެގެންދާނީ ފައިސާގެ މުޢާމަލާތްތައް ފަސޭހަކަމާއެކު ކުރެވޭ މުޖުތަމަޢަކަށެވެ.

ޔޫޕީއައި ތަޢާރަފުކުރުމަކީ ދިވެހިރާއްޖޭގެ ވިޔަފާރީގެ ތާރީޚުގައި އައު ބާބެއްގެ ފެށުމަކަށް ވެގެންދާނެ ކަމެކެވެ. މިއީ މަސްވެރިޔާއިން ފެށިގެން، ކުދި ވިޔަފާރިވެރިޔާ، ފަތުރުވެރިޔާ އަދި އެހެނިހެން ވިޔަފާރިވެރިންނަށްވެސް ފަސޭހަކަމާއެކު ޑިޖިޓަލް އިޤްތިޞާދުގައި ބައިވެރިވެވޭނެ މުސްތަޤުބަލަކާ ދިމާއަށް ކުރެވޭ ދަތުރެކެވެ.

އެހެންކަމުން، ކުރިމަގަށް ބަލާއިރު އެއް ކަމެއް ޔަޤީންވެއެވެ: ދިވެހިރާއްޖެއަށް ޔޫޕީއައި އާއެކު ޑިޖިޓަލް ޒަމާނަށް އިތުރު ހަރުފަތެއް ގިރާކުރުމުގެ ފުރުޞަތު ލިބިގެންދާނެއެވެ. މިއާއެކު ކޮންމެ ސްމާޓްފޯނަކީ މާލީ މިނިވަންކަމަށް ވާޞިލުވުމުގެ ދޮރަކަށް ވެގެންދާނެއެވެ. ނަގުދު ފައިސާގެ ބޭނުންކުރުން ދެމިގެންދާއިރު، ބަދަލުގެ ނިޝާންތައް ރާއްޖޭގެ ރަށްތަކުގައި ފެންނަން ފަށާނެއެވެ. އަދި ޑިޖިޓަލް އިންޤިލާބެއްގެ ފެށުމަކަށް މަގުފަހިވެގެންދާނެއެވެ.